لك في خفوقي نبع لا يمكن يشح=نبع المحبه والغلا والتوداد
ياللي عليك الدمع من ناظري سح=وان لاح زولك يا ضنى الروح يزداد
يكفي على جسمي من مفارقك مح=ويكفي على راس القلم ينزف مداد
حبك على قلبي مسلط مسلح=حاصرت وجداني على كل الابعاد
حتى ضميري بالمحبه لكم لح=والسمع لاصواتك وتفكيري انقاد
قلبي بحبك يا سنا ناظري طح=حتى تسيد خافقي والولا ساد
ارزف معى اهل الرازف وناظري دح=والصبر عيا لا يطيق التجلاد
اهيم لجلك وانت للروح تجرح=صار احتلالك زي تدمير بغداد
رجع فوادي يا هوا البال واستح=وارحم عشيرٍ عاش ما عنده فواد
لو مثلو حبك على ظهر مسرح=طاح الخشب من ثقل ما فوقه وماد
ابغا اطلبك طلبه ثم ارجوك تسمح=تذكار يبقى لي معى سلم وجهاد
ابغا اذكرك من وين ما ريت مطرح=لوكنت انا ببلاد وعني لك بلاد
سهم الوفى في خافقي صار يقدح=واسمك مشرع فيه والضيق وراد
ناب الخطر من هجرك اليوم يكلح=هبت علي الموت صلفات الانواد
خايف على قلبي من الضيق يقرح=لن الغلا ما فاد والبغض ما فاد
صورة عديل الروح فالقلب تسبح=وانا غرقت بها بليات ميعاد
اخاف لا من هاجسي بالغلا افصح=اصبح شماته بين صفات الاجواد
الدهر عيا تالي الوقت ينصح=في كل يوم يزيد لي بالتوجاد
نيران دوراته على الخد تلفح=ما ارتحت برقادي ولا ذقت لي زاد
بس القوافي في ضميري تلقح=وتخلف ابداع الجمل جمع وافراد
من بعد ما قلبي عليها تفضح=خايف يسوا بي مثل عبد شداد
تاتيني الابيات ماهي تنقح=الفظ معانيها ولا به ترداد
ما هي تعنيني ولا هي تصحح=وتكون لجروحي ودمعاتي ضماد
الكل في ذا الكون يسقط وينجح=الا طريح الحب ما عنه نشاد