الملتقى الجماهيري للشاعر محمد بن فطيس المري - ياذيب قلبك جســور وهيبتك في دهــاك

ياذيب قلبك جســور وهيبتك في دهــاك
وعيون الأعراب والله مالقت غير أثرك

من عادتك تطوي البيدا وتكسب عشاك
واللي يبي صيدتك عـوّد وهــو ماقدرك

خلك على الرجم واللي يرصدك من اعداك
يخاف من جرة أقدامك ويخشى خطرك

لا تنحنـي للتراب تعد ممشى خطـــاك
حـاول على قـد ما تقـدر تبعّــد نظرك

ولا تحسبن العيـون مغمضة ما تراك
النـاس هالحين مايخفى عليـهم خبرك

ولو نال منك التعب والوقت بيّح خفاك
هـذا نصيبك من الدنيا وهـذا قــدرك

تسمع صياح العرب ياذيب والعلم جاك
ولو راعك الغدر بكره مايفيدك حذرك

خوفك من البرد للضلع المهايف حداك
والضلع لويقدر يكسّر ضلوعك كسرك

ترميك الأقدار بين اللي غدرك وجفاك
ليتك تركت المكان اللي جفاك وغدرك

تشبعك يمناك والوادي تحت ماعطاك
غير الجفا والطعون اللي تجي في ظهرك

احزم ضلوعك عن اهل الارض وابعد مداك
عن شوف ناسٍ يصبّون الغضب في نحرك

والنـاس لو تنتهك ضلعك وتدخــل حماك
لاتشـره الا على عزمك وحــدّة بصـرك

مربـاك قتّــال ودروبك ظـلام وهــــلاك
وعواك مسموع وفعولك مع اللي حقرك

مالك من الضلع غير الجوع يطوي اشواك
والبرد يشذب عراقيبك ويشوي سحرك

حظك على الوادي اللي مايذري رماك
ولومك على اللي على ضلع المعادي جبرك

قنيب جوفك صدى حزنك وزفرة حشاك
ولومنت مهيوب محدٍ بالشجاعة ذكرك

يشهد لك اللي على أحفاده كتبك وقراك
ولا انت عالم من الصعب الزمن يختصرك

ياوجد حالي عليك من الزمن لاوطاك
وخليت رجمك ومرقابك وعبرة قهرك

</b></i>