السلام عليكم ورحمة الله وبركاته الله يمسيكم بالخير
هذي الله يسلمكم رديه بيني وبين واحدٍ من الربع على الجوال
مداعبات بيني وبينه داايم وحبيت اني اعرضها لكم بغرض
التسليه والونااسه
هو يقول
سلام تسليمٍ يخص المطاليق .... الكل منهم ياصله ويعنا له
ربعي هل الفزعات في ساعة الضيق ..... اهل الكرم والمرجله والشكاله
لولا غلاهم مابدعت الطوريق .... الكل منهم له معزه لحاله
بشكي لهم وقتٍ يضد العشاشيق .... بدال طول الهرج نقصر حباله
انا سباني حب بعض المخاليق .... حبٍ تصوب وهو عاده وكاله
حبٍ سطا مثل الجبال الشواهيق ... ومن جاه مثلي آه وا عزتاله
الله من قل البخت والتوافيق ... يدور حظي مثل دور المحاله
ياناس من دون المحبين ما اطيق ... تصبح فجوج الارض مثل البياله
وسلامة اللي لا وقف كنه طويق .... والى تحرك ما على الدرب شاله
ورديت عليه بذالابيات
يامرحبا كنها نبات الزماليق .... تنصاك يا عز الرفق والزماله
ياللي يحلق في سما المجد تحليق ... واقصى الرفاقه له عليهم جماله
له في علوم العز بصمه وتوثيق ... ومعربٍ مابين عمه وخاله
الله يجيره من علوم المطاافيق ... اللي يمين الخير واللي شماله
مرن مغابيش سواة النواعيق .... ومرن يسابق فالعصاري ظلاله
يبغي حلاله ما تجيه السواحيق ... وهو ما درى ان مسعاه يمحق حلاله
ماهو يخايل لا يحات البراريق ... ما جاه من خيرٍ يدور بداله
وانا وليفي مدهله بالمعاليق ... يختار منها مسكنه والشلا له
ابيع كل الناس جمله وتفريق ... واشري وصاله لو تهيئا وصاله
ان دبرت فيها وصوف المدانيق ... وان اقبلت مثل القمر في كماله
زينه من الله ما حصل فيه تلفيق ... يفداه من يشري بماله جماله
وسلامتكم
