حبيت راسه وقلت أرجـــوك حللّها
يا جدّ عندي هموم (ن) تفرش الصاله
هذي مسائـــل أبي تعريف مجملها
يا جدّ وقتي ذبحني من ردا حالـــه
ما عاد فينـــي أَزمّ حمول وأحملها
الناس تجحد كريـــم وتنكر أفضاله
حتى صديقي تردّى مــــع رذايلها
يا جدّ تكفـــــى ترا مليت هالحاله
عطني نصيحه وأنا أوعـدك ما أهملها
عَــــدَّل جلوسه وقام ونكّس عقاله
قال اسمع الشــــور منّي لا تطوّلها
أعرفك شاعر ذهيـــن وتعرف القاله
مير اكتب القاف واعرف كيـف تجزلها
لا تظلم الوقـــت خل الوقت في حاله
وش دخّل الوقت يبلش مع خبايلهـــا
كم واحـــد(ن) جا بفكره يركض لحاله
وإلى توهّق .. يقول : الوقــت عاملها
يا باغي الطيـــب طبّ وشوف منزاله
أقرا حروفي ودقـــق في دلايلهــا
الرَجْـــل وقفه .. وطيبه طيب أخواله
والنفس شينه تطيــــب بطيب شايلها
احـــــذر ترافق دنيّ النفس وأشكاله
النفس تصبح قرينــــــه في مثايلها
خـــــل التعالي وقَول الزور وأفعاله
وأكسب جميلــه وكثّـــر من جمايلها
أبذل سخـاك وتبــدّى زبنك بفالــــه
وقدّم لضيفك وليمــــــه ما تخيّلهـا
ولا تســــــرج الخيل إلا وأنت خيّاله
ولا تجلب الدّون وأجلــــب من أصايلها
ولا تعشـــق المدح التطبيل والهالـــه
مـا ينفـع الحـــرّ غير أفعــال يفعلها
خلّك لـ رَبْعك رفيــــق وعـزّ من جاله
ولآ تعــــــذَّر بدون أسباب .. تجملها
والشرّ فتنــــــــــــــه فلا تبدأ وتسعى له
وإن جتك زلّه فخلّ الصفــــــح يشملها
وإن جاك شاتــــــم فخلّ وجنّب خباله
خلّه يولّي ترفّــــــــــــــــــــــــــــع لا تنزّلها
الطيب عليــــــا وطيّب حظ من طاله
لا شك ما هو بدون أثمــــــان يبذلها
العمر ساعـــــــة وكل الخلق رحّاله
واللي خلقها تعهّــــــــد ما يذَمْلّها
وآخر نصيحه نطقها بآخـــــر أقواله
كمّل بها عِقْـــد .. من ( لولو ) وجمّلها
إن كان تبغا شموخك يصلب أطوالــــه
بنت الحمايـــل حـذاري لا تـغــازلها
قد قال جدّي وجدّي تصــــــدق أمثاله
الناس تخطي وتهرب من عمايلهــــــا
يا زيـــــــن جدّي ليا من نكّس عقاله
وأطلق حجاجه وجاب الـــــدرّ وأرسلها
إلى هنا تنتهي قصيدة الشاعر ( زائر المساء )
لكم خالص الشكر والتقدير مع الأحترام الوفير
مني أختكم في الله جميعا حروف من نور ..
