سلامــي ســلام الكـبتنَ القــايد المسـؤول = عـلى اللّـي حـفـظـت اسمه من أوّل بداياته
على شاطيء البحر العميق انتهادى اللّول = وأنــا فــاهــمـــن قاصـد وعــارف حـــراكـاته

عليك السلام ورحمة الله وانت تطول = على قاصد الماثل وتعرف حكاياته
اذا كنت تبغى تقول لي شي تامر قول = وشرواك يبلى بالخطيه على سكاته

ألا يارفيق الــدرب ما عــاد بــه مـجهول = عـــســى الله يــمــد الطّــيب بــقدر نيّاته
نشوف العرب تحكي ولو حكيها معسول = يحيّرك بعض الناس مــن كثر هــمــزاته

توكل على الله كل مغشوش يبغى يزول = قطار الحقيقه واصل آخر محطاته
اذا ضامك الحمل الثقيل ازهله مشيول = واذا ضايقك شينٍ من الوقت لي هاته

يقولون به في سكّة الـدرب دقّ طبول = إلا شاف صوتن عذب لاحــى لشـيلاته
وأنا من زمان أصول بالمعركة وأجول = ورفيق السعد نجبر كسوره وعثراته

يقولون بعض الناس شافوك وسط المول = وانا خابرك مالك غرض في بضاعاته
تبي تشتري غتره وهو يعرض المريول = من اللي يدور عند سوق السمك شاته

ما ننكر مدام الوضع يا صاحبي مقبول = لـكـن مـا قهرنـي غـير قـاصد بطبّاته
لـفـى قـبـل يـوم وقال زبدة بطعم الفول = وأناظر وإلا هي عكرة الضب بشفاته

علامك فتحت الباب الآخر وهو مقفول = ومن يفتح الابواب تكثرمتاهاته
نعيد السوالف لاصلها والحكي المعقول = قبل ندعي الماضي ونفتح ملفاته

لوان ماني اعرف صاحبي قلت ذا مهبول = لكن دام مفتاحه معي واين وجهاته
أجــل ويش حل اللغز ياللـي مـعـاه حلول = وياخوفتي من حلّ قاصد وطمراته

انا لارتكيت اشيل حملي ومعه حمول = ولي موقفٍ واحمى عميلي بغيباته
ولغزك علينا الزم من البارد المزلول = الى خاضه اللي ماتهقويه رمعاته

تقوله وانا عارفك قول وعليه فعول = خويي واعرفك لا رمى الوقت غاراته
أنا ما نشدتك غير من هرجة المشلول = واش اللي يبيه النذل من كثر غمزاته

على الطيبه سباق عمرك عساه يطول = يزول الردي حيشاك وتزول اشاعاته
ولا تتبع القوال خل اللـ يقول يقول = مصيره على شيناه يخسر علاقاته

صبرنا وذا عامين حولن يرادف حول = وقلنا فهمها غير يا كثر شطحاته
أعرفه وثوبـه دايمن مـن فـهـد مبلول = وقـدّام خـلـق الله يـفـتّل عضالاته

دواكم على ماقيل مايشفي المعلول = كفاك الولي من سو بقعا وصكاته
الا ياعريب الجد سيف العدو مسلول = وانا خايف انه يقتحمني بغراته