أن جاد حظك باع لك واشترى لك
فوايده من كل الابـواب تاتيـك
وان باربـك دلاّ يهـزّل حلالـك
باردا ثمن لزمٍ يبيعـك ويشريـك
وان جاد حظك بالمجالس حكالك
صدق مقالك كل من لك يحاكيـك
وان باربـك دلاّ يكـذب مقالـك
وتصير كذبات الملا كلهـن فيـك
وان جاد حظك بالمنـازل بنالـك
بيتٍ رفيعٍ شامخ الطول يذريـك
وان باربك خلاك تنقـل عيالـك
من دار إلـى دار ودارٍ تجليـك
وان جاد حظك كل شيءٍ صفالك
وقرايب الخلان كلـن يصافيـك
وان باربك بين جميع العدا لـك
وصار المحب اعدا عدوٍ يعاديـك
وان جاد حظك كل شيءٍ عنالـك
ويباشرك عند المـوده ويعطيـك
وان باربك ظليت محـدٍ بحالـك
ولا بفنجالٍ مـن البـن يسقيـك
وان جاد حظك قام واطلق عقالك
ومشى معك في كل درب يباريـك
وان باربك جوّد يميـن الثنالـك
وعن كل دربٍ يعقلك ثـم يثنيـك
وان جاد حظك كل شيء زهالـك
حلياه بارواح المجالس تزهيّـك
وان باربك شيّن حلايـا خيالـك
لا اقبلت تغضي كل عينٍ تراعيك*
وان جاد حظك كل شيء أضالـك
يشبه فم القنديل نـوره يقديّـك
وان باربك عزي لحالي وحالـك
أرذل رذيلٍ هافي الجـد يوذيـك[
