***
اذا المراجل لبسة شمـاغ وعقـال
قـل للعـذاري يلبسـن العمـايـم
ماعاد يفرق زول حرمة ورجـال
دام الفعايل تشبـه البعـض دايـم
المرجلة ماهيـب كلمـة وتنقـال
وتروح ماراحت هبـوب النسايـم
ولا خشونة صوت اورفع الاثقـال
او رزّة صـدور وفعـل الزلايـم
ولاهي بعد مفتاح موتـر وجـوال
والـّا ردى لسانـن حديثـة شتايـم
المرجلة شيمه عن القيـل والقـال
رفيع نفسـن حـر بـ جـو حايـم
المرجلة عقل وزن وزنـه جبـال
ودون العقل وش فرقنـا عن البهايـم
يامسندي لومايل الوقت بـي مـال
ياولـد أبوي ياعظيـم العزايـم
يامعرب الجدّين من العـم والخـال
يانخوة المفـزوع وقـت الهزايـم
المرجلة ياخوي هي طولـة البـال
هي العزم هي الصبـر فالظلايـم
فيها الكـرم عـزة دلـّه وفنجـال
فيهاالكرامه عن ردى الطبع شايـم
والدّين لامنه خـذا القلـب منـزال
مشى طريق الحق وابليـس نايـم
ومن لاعرف ربه في طيب الحـال
لابد وقـت الضيـق بالهـم هايـم
حتى صلاتك مع جماعات ورجال
في خيرها ياخـوي نعـم الغنايـم
ولامن نصف ليلك قم صفّي البـال
ياعظم اجرك بيـن ساجـد وقايـم
ولامن رفع ربي له كل الاعمـال
حسّن الذكر لاقالوا فـلان صايـم
وخلك شريف القصد ياطيب الفـال
سوء المقاصـد فالبيـوت الهدايـم
واحذر تبيع النفس في درب الأنـذال
وتتبع خـوي ابليـس راع النايـم
النفس خيل لـك اذا كنـت خيـال
ومن لاقوى نفسه قوتـه الهزايـم
ولاصرت ماتدري وش معنى رجال
والله خسارة فيـك ذبـح التمايـم
