يا صاحبي ميزة اهل الميزه تنقح=حتى يسمى النفر شاعر او اسطوره

ومسابقات الشعر فيها الجمل تقرح=بالوزن والصوت والتنظيم والصوره

واللي قدم للمسابق ليه يتويح=يرضى بمدة يمينه دون فاتوره

ما دمت لي يالخوي وجهة بالمسرح=خذ من ضميري نصايح مجلس الشوره

الشعر قاف ووزن وافكار تتلقح=وشعور واحساس وابداعات منثوره

الزين منها على اهل الكون يتوشح=والشين ما حد يبيه ولو فهق زوره

حتى لما الناس تاتي فيه تتصفح=تترك تعابيرها بالود مخشوره

لك يا ابن مشهور طيب المسك يتنفح=يالموسوي هاك تعبيري ودستوره

ان كنت تبغى الشعر يا شيخ يتربح=خل المناقيد دام الناس مستوره