تواصليه .. ارتجاليه
ارجوا تمريرها عبر ذوائقكم الراقيه
ياحضرة المأمور/ يا هاجس الطّيب = عليك /ابا آمر /بالرضاء والغصيبه!
خذني معك في نايفات المراقيب = ما /عاد/ يكفيني .. سنام النجيبه
الحر مال احدن براسه مطاليب = والنجم ما احدن يردعه عن مغيبه
طابت لنا بعض البكار الرعابيب = مير الزمن /له/ بين الاحباب غِيبه
ولولا مقادير اللحا والاشانيب = بعنا مجاهيم الليال ب زبيبه!
ياحضرة المأمور لاتجرح الذيب = الذيب /جرحه/ دون قتله مصيبه!
أما إتركه يِرثع بحرش العراقيب = او /إرتبع/ لاقمت تسمع قنيبه
و يا من لقلبٍ فيه مثل اللواهيب = ويا من لعينٍ من نظرها كئيبه؟
دارت بي الدنيا على مركب الغيب = وانا احسِب الدنيا /حبيبه/ لبيبه
وأثر الزمن كاذب ومن غير تكذيب = يلعب على العالم بكَذْبه غريبه
و يا هاجسي .. نيشن على اللوح وتصيب = رصاصتك تعمل جروحٍ عطيبه
وانا ليا نيشنت لو ساعة إمغيب = تصويبتي تقصم ضلوع الضريبه
ماني معوّدها على الذلّ والعيب = ومدحي لنفسي صِدْق ..والكذب خيبه!
