**
الحال ياللي جيت تنشد عن الحال
لاني صحيح ولا عليه خلافي
جريت لك من واهج الشوق مواال
واشعلتلك نار الفكر والقوافي
هاك القصايد هاك يا لابس الشال
جمر الغياب ولهفتي واعترافي
تركتني ما بين شامت وعذال
واهديتني حد السيوف الرهافي
يمرني طيفك مع الليل يختال
واذب صوتي لكن الطيف جافي
قلت ارسمك في لوحة العشق تمثال
والا انت كلك بالضلوع النحافي
يا سيدي بعض الهوى عشق قتال
مصيبته يظهر جميع الخوافي
حبست عشقي خايف<ن>قول ينقال
حتى غيابك صابني باختلافي
عقبك حياتي تافهه والزمن مال
هبت على قلبي هبوب السوافي
دلو الحنايا يصطفق داخل الجال
والويل من دلو<ن> للاحباب صافي
شوقي قدحلك نار وظلوعي دلال
واقول لظلوعي عساها عوافي
تبدلت في غيبتك كل الاحوال
حتى النهار بظلمة الليل غافي
الله دخيلك صرت مظرب للامثال
حزني قصيدي دمعتي وارتجافي
ما للفرح في داخل القلب منزال
ياحسبي الله جاير الهم ظافي
يشيلني من لوعت البعد شيال
واناعلى عهد الوفى دوم وافي
تبي الصراحه كل طاري على البال
ظيقه بظيقه واسال الله كافي
والحال دامك جيت تنشد عن الحال
بالمختصر عقبك ترى الكون طافي
