برفوق يازين التواصيف برفوق=تعال نجلس ونتمالا دقايق
انا على شوفتك حاديني الشوق=واذا ذكرت البعد قمت اتضايق
اشفق على لاماك يازين واتوق=عن دربنا فك العقد والعوايق
ماتدري انك ساكن داخل الموق=تضفي عليك جفون عيني طبايق
وماتدري ان قلبي من العشق مفتوق=ليتك على قلب المولع توايق
تلقى محلك يارّيَش العين مرموق=ارتاح خل البال هادي ورايق
وخلك رزين العقل لاتصير مطفوق=واترك هروج مزورين الحقايق
انا معك ماني مع كل مخلوق=اسمع كلامي ياحَسِين الطرايق
كتبت لك من زبدة الشعر طاروق=نقّيتها لك من زهور الحدايق
ونشرتها في منتدى العرف والذوق=وثبتها لك بالصور والوثايق
مضمونها طعني وخل النظر فوق=والله ماينفعك هرج الخلايق
وختامها لو تستمع كل منطوق=ماعاد فيها ياوليفي دقايق

المصدر: الملتقى الجماهيري للشاعر محمد بن فطيس المري