الملتقى الجماهيري للشاعر محمد بن فطيس المري - عرض مشاركة واحدة

03-23-2012, 02:38 AM

من اشعااره

شفتك بعد غيبه
شفتك بعد غيبه .. وحاولت احاكيك
مهوب من قلبي ولا من جراته !!
بغيت اقول / فلان وازريت احاكيك
وكني سمعت اسمي معا لالتفاته
فزيت من نومي وانا اقول لبيييك
وآثرك رويا .. في منامي وجاته
صفقت كف .. وقلت يا حلم يشوويك
جددت لي جرح ٍ هنى في مباته
يا اللي شريت البعد .. ما غاب طاريك
حتى لو ان البعد .. سواا سواته
مهوب محزني .. على حاجةٍ فيك
إلا إن قلبي شايف ٍ بك غناته !!
كن الطيوف تقول وشحال غاليك
وآقول راح .. وما بقى الا غلاته
لو ان ما جاني من الهم ياتيك
كان المصلي ما حفظ وش صلاته
مريت شارعكم .. وصادفني آخيك
واللي قطع كبدي .. حلاتك حلاته
بغيت الخبط من دعاياه ,, وادعيك
واسمك وقف بين اللسان ولهاته !!
وبغيت اجيب العيد وآقول : يرضيك
فاللي وصاتي له .. وضيّع وصاته
البعد شيّب خافق ٍ ميت فيك !!
والى مشى خطوه عثر في عصاته
مشكلتي / إن قلبي يحبك ويغليك
ومشكلتك / انك شخص عايش حياته
كثر الجفا .. نار .. وحطبها تغليييك
خف الحطب .. لا تزيد نار الشماته
إن ما احزنك جرح ٍ برجواه يدعيك
ما عاد تفرق .. عيشته من مماته
قلبي وعمري كلها بين اياديك
العمر فدوه .. لكن القلب هاته !!
وإن ما بغيت ترد قلبي ما اوصيك
احسن عزاه .. الى دريت بوفاته

دمعة الرجال

يا عذابي كل ما حان المغيب
وارتسم لونه على لون السحاب
والهدو يطغى على الجو الرهيب
هاضني شوفه وشرع كل باب
واستثار الشوق جرح مستصيب
وغنت جروحي على ليلي عذاب
حولت بي كل هم من شعيب
واستباحت حرمة القلب المصاب
وقامت الذكرى على قلبي تجيب
الهموم اللي من اسباب الغياب
عزتي للي مفارق له حبيب
واحد قلبي معه من يوم غاب
لا ذكرته تنزل دموعي صبيب
من سبايب خاطر فالحب ذاب
صرت كني لاجي ولا غريب
دور الماء ما لقى غير السراب
العرب في سيب وآنا لي فسيب
ضاقت الدنيا بعيني والرحاب
من يقول ان دمعة الرجال عيب
اشهد انه ماهو بحول الصواب
تنزل الدمعه غصب ماهو بطيب
لجل من ترخص على شانه رقاب
لو يخيب الظن ظني ما يخيب
يلعن الحظ الردي لو يوم خاب
لو شربتك ما رويتك ياللبيب
سل حال اللي غديتي له شراب
لو حروفي فيك يقراها اديب
كان الف من معاناتي كتاب
ولو يردك عن بعادك شق جيب
قلت يالمضنون تفداك الثياب
اسمعو قولي وانا ربي حسيب
دام ما فوق التراب الا تراب
من مشى دربي ترى دربي صعيب
حيله يوقف ويعلن لانسحاب
والحياه اقدار والصايب يصيب
كود ينفعك الدعاء المستجاب
والمحبه اصلها حظ ونصيب
والهوى ما بين غربه واغتراب
ومن يقول ان دمعة الرجال عيب
اشهد انه ما هو بحول الصواب

قصيدة بآفارقك

بافارقك .. لو كان ما اخترك فرقاك
بافارقك .. وآنا فرجوى وصالك
البعد لو به خير ما كان خلاك ؟؟
تقطع من عيون المحب اتصالك
ما اكثرك فالصده وفالوصل ما اشواك
الكبر لله .. ( لا يغرك جمالك ) !!
خليتني للبعد .. والبعد قسّاك
خلاك تنسى واحد" قد وفا لك ؟؟
سليت سيف الهجر ؟؟ كني من اعداك
وذبحت شوق الروح شاللي جرى لك
العام ما تصعب الى قلت بلقاك
واليوم من دون المواصيل هالك ؟؟
منت بردي .. حسبي على الوقت ردّاك
غير صفاك / وطيبتك / واعتدالك
حاولت نسيانك .. وعييت لا انساك ؟؟
لا جيت ابنسى .. ذيب صدري عوى لك
لو انك بترجع كثر ما آتمناك ؟؟
ما كان ذا حالي .. ولا ذا بحالك ؟؟
كثر الجفا وآنا أستغفر الله اشراك
حبك كفر بي .. لعنبو من صفا لك
خذاك مني البعد ما عاد بقاك ؟؟
لكن على قول المثل مش حالك
تدري وش اللي يقتل الشوق يا ذاك
لاني بولد عمك ولا ولد خالك ؟؟
الشوق برد .. ودافي الوصل لقياك
وثلج الجفا خرب طريق اللقا لك
علمتني حبك .. وعلمني انساك ؟؟
لو كان من دنياي .. مابه بدالك
تبغي تضيق خاطري جعله فداك ؟؟
مهوب انا اللي يعاتبك في حلالك
طلبتني قلبي وانا قلت لك .. جاك
والحين سو بخافقي ما بدا لك ؟؟

قصيدة سحايب

تغيب ما علمتني .. ليه غايب !؟
كنك تعودني على ( غيبتك ) دوم
سما غلاك ابطت عليها السحايب
وطيور حبك قد لها ماهي تحوم
نار الهموم لها ضلوعي حطايب
وصدري وجار " ناره افكار وهموم
والشوق يلفح نارها بالهبايب
حتى دفنها طاري بالبعد بالسوم !!
الحب لا جاء ما يجي بالغصايب
حتى ولو تفرضه عادات وسلوم
والوقت .. جارحني ولاني بطايب
ويزيد جرحه جرح يا جعله القوم
اخطيت فغيابك وابد منت صايب
وما ينهدم حب بنيناه في يوم !!
لا جيت لي بسألك ويش انت جايب؟
احس غيباتك وراها لي اعلوم
يرحمك يا قلب من الحب ذايب
ويرحمش يا عين معد جالها نوم
الدمع منها فوق خدي صبايب
ارخى مشاهيبه على خدي وسوم
يا وجد حالي وجد عود وشايب
لا جاء يقوم تعيي ارجيله يقوم
جافينه عياله ولا له قرايب
من عقب ماهو لحاله يناطح القوم
على الذي هو لوعتي والسبايب
متنابي الردفين .. بالذوق مفطوم
صفين رمشه صف جيش وحرايب
كنها جيوش الفرس في مجابه الروم
ياما علشانه شعبت الركايب
ما همني منقود ربعي ولا اللوم
لا شك دونه .. بالمحبه طلايب
دونه بني عمه .. على الحايم تحوم
فإن مت .. من حبي فسود الذوايب
فالموت حق وكل نفس لها يوم
لا شك .. انا باجيه ماني بهايب
وما قدر الله للفتى جاه ( مقسوم )

أحلى ذنوب الحياه

الذنب في وصل حبك .. ذنب غير الذنـوب
يا أحلى ذنوب الحياه .. اللي بنـا مذنبـه !!
يا نور شمس الغلا .. لا تغيب شين الغروب
سنا جبينك .. تعبت آحايلـه .. وارقبـه !!
تعال واشرب هوى الانفاس .. من كل صوب
وعطني هوى انفاسك المجنون .. ابغى اشربه
ابيك !! وابغى احترق بك واحترق لين اذوب
واللي من الشوق في صدرك لصدري جبه !!
سكت واخفيت حبك يـا الصـدوق الكـذوب
ودسيت دمع اشتياقـي قبـل مـا اسكبـه !!
تقول تكفى لحد يدري .. وأنا بـك يـا دوب
اموت من كلمتك .. والموت يـا مقربـه !!
ذبحتني بالسجايـا البيـض وأطهـر دروب
ما فيك عذروب لجـل آجيـك وآعذربـه !!
حبي لشخصك لضى ويشب شوقـي شبـوب
والغيره تحط ضلعان الغـرام .. احطبـه !!
لا يا ممـات المشاعـر وانكسـار القلـوب
ما هوب انا اللي تحسب ان الحـزن عذبـه
الله خلقني كذااا .. شاعر وحكيي محسـوب
وقلبي معا الوقت ما بينـي وبينـه شبـه !!
وإن كاني حزني ملا وجهي بغيـه شحـوب
فيسامح الله مـن جروحـي غـدت بسببـه
شاعرك يا ملهمي صب الاحاسيـس كـوب
ونمـى بحبـك مشاعـر تنتظـر موهـبـه
اعجبتني واشربك الاعجاب فينـي شـروب
معـا انـه يقـول محـدن فالبشـر يعجبـه
طفولتـك والبـراءه يـا الغـزال اللعـوب
تلـت معاليـق ذوقـي واقـدرت تنهبـه !!
وكلامك الموت يشمل بـي ويجنـب جنـوب
وافـز لا مـن حكيـت السالفـه وانتبـه !!
كني على رجم شوق وكل ضحكـه هبـوب
وسوالف البرد .. في حضـن الدفـا تسكبـه
يا صاحبي .. لا بغيت الوصل دجت الدروب
ابوصلك لو على لقيـاك .. قطـع رقبـه !!
ما دامي اذنبت حبك ( جعلني مـا اتـوب )
يا احلى ذنوب الحياه .. اللي بنـا مذنبـه !!