يالله عسى خيرة ويالله عسى خير=القلب عوّد فيه خفة وراعه
يجتال من زود الهواجيس وينير=زادت وهو ماعاد يملك مناعه
ومايمنعه لايفلج الصدر ويطير=الا رجاء الله ثم صلاة الجماعه
مسيت يااعز المخاليق بالخير=ترى هواجيسي سببها القطاعه
احفى قدم رجلي طويل المشاوير=لي فز قلبي قلت سمع وطاعه
اشتاقلك ياسيد كل الغنادير=شوق الغريب لشوف حيه وقاعه
ياكثر جياتي وكثر المعاذير=لو ان مالي من وراها طماعه
وانا ادري انك ماتبدلت بالغير =ولا انته من اهل الفلسفة واللكاعه
لاشك دونك مخلفين الطوابير=اللي تجيب العلم في ظرف ساعه
روس الرجال العارفين المشاهير=اللي نباهم نسمعه في الاذاعه
ولا ودي ازعل كثير الجماهير=قبل الخطا ياجب علي الوقاعه
الله يجعل خاتمتها على خير=والله يملكنا الرضا والقناعه

المصدر: الملتقى الجماهيري للشاعر محمد بن فطيس المري