هيضتني ياللي تجر الطواريق
وغنيت لوماني بالأمثال مشتاق
أحدٍ طرب وأحدٍ يغني من الضيق
يبا يوسع خاطره كل ما ضاق
يضيق لين من الزعل ينشف الريق
عليه من دنيا العناء هم وارهاق
يسهر ليا نامت عيون المخاليق
في حجر عينه حالي النوم ما لاق
عيا يطيب لها حلا النوم ويليق
تسهر وكن لها مع السهر ميثاق
همٍ لا جاء فالقلب بين المعاليق
عز الله أنه محرقٍ قلبي احراق
أفيق منه أحيان واحيان ما افيق
وقت همومه راحت أشكال وارناق
وباب الفرج صارت اقفوله مغاليق
والبال من كثر الهواجيس ما راق
كني بغبات البحور الغواريق
من كل وجهه فوقه الموج صفاق
يا هني منهو يقدر الصبر ويطيق
ولا شرف على راس الطويله ولا واق
محفى قدم رجله بروس الشواهيق
يرقا الوعر كنه لمرقاه عشاق
متى تزين أيامها للمطاليق
وينزاح ضيق البال وتزين الأخلاق
لون مال الوقت عهد ومواثيق
من يامن الدنيا تعوقه وينعاق
آمالنا فيها على غير تحقيق
سراب قيضٍ فاشهب اللال لا هاق
من باب شك وباب ظنه وتبريق
وتجمع لها حيٍ تقفاه بفراق
تجي لخلتها على العبد أراويق
ويذوق علقم مرها مثل من ذاق
والعبد ما له عن قدرها مداريق
لن دبرت عجلات الأيام وسباق
يقولها اللي ذاق مر المذاويق
وفي كل ليل يشوف للحزن براق
الشاعر : عبدالله بن شرير الشلاطي
