لايطول سكوتك ولايطول سكاتي
ترى الدعاوي بسيطه لاتكبرها
خلك على خبري وظني وهقواتي
خابرني الضيق والضيقات خابرها
وسع لي البال ياسيد طموحاتي
ولا تغير النظره اللي كنت تنظرها
تقول حب البشر طوق مساراتي
ابك انت حبك مساراتي يسيرها
إن غبت عانت عيوني من معاناتي
وذكرك يصبرني وطيفك يصبرها
لايابعد شهرتي واعظم نجاحاتي
وكل القصايد من ابسطها ليا اشهرها
ولايابعد من يدور لانكساراتي
شعار سبب وجودي ضيق خاطرها
إنت اجمل اللي تسجل في سجلاتي
من جيت وين البشر وإن رحت ماكثرها
ياول واخر قصيدي واروع ابياتي
محد يحب القصايد كثر شاعرها
مافاق حبي لك الا حبي لذاتي
يعني احبك محبه ماتصورها
ياصدق من النشوه اللي في بداياتي
لاقلت لي كم بيت وقالو انشرها
واغلى من الدمعه اللي كل صدماتي
تطلب يديها واحجرها ولا انثرها
واحن مني علي ان شفت زلاتي
القاك بررتها لو صعب ابررها
واطهر حكاية محبه في حكاياتي
من قبل لاعيشها حسيتك اطهرها
لاتلومني لابديت اخاف واحاتي
كل حاجة غاليه ماودي اخسرها
ولاتضايق اذا كثرت جياتي
ضيعت فيك السنين وجيت ادورها
تعال رتبني ورتب حساباتي
او تدري وشلون؟رتبني وبعثرها
مو مشكله لو تصير اطول مسافاتي
المشكله لابديت احسك اقصرها
اكبر عيوبي بديتك من نهاياتي
واكبر عيوبك لقيت اولك باخرها
يامكتشف عالمي واقدم حضاراتي
حرام كسر الخواطر بيد جابرها
مادام تقدر على اللي فوق قدراتي
لاتذخر الفزعه اللي قلت ذاخرها
رجعني لوقتي او رجع لي اوقاتي
عامين تنطرني وعامين ناطرها
وتقبل الود والشكر وتحياتي
ياساكن الروح والروح ومشاعرها
وروق وركز وحاول تفهم الاتي
فكره تاكد قليل اللي يفكرها
لو إن غيري معاك يسوي سواتي
قلت انت نعمه وهو عاجز يقدرها
