الحكم حكم الله وحكم الشريعه = وقبل الثوابت كلها خمس الأركان
صحيح بعض البدع يكفي جميعه = لا قاله اللي ما ورى لسانه لسان
الصبر ما كل البشر تستطيعه = والصمت ضيقة صدر في بعض الأحيان
ما أقول عاد ضلوع صدري منيعه = أقول عاد السر في طي كتمان
الرجل لا ضاقت عليه الوسيعه = ما هو بعيب إن سيل دموع الأعيان
العيب والمستغربه والفجيعه = لا راح يشكي عند حي الله إنسان
رح علم اللي يحسب إني تبيعه = الطيب ما يقبل من كفوف منان
لا صار ما سال المطر في ربيعه = وشلون في صيفه تبي تسيل الأمزان
واللي رفع قدر النجوم الرفيعه = ماني بلا جاحد ولاني بخوان
أنا كذا فيني من الله طبيعه = ما أقدر الهافي ولو كان من كان
نفسي تشوم من النفوس الوضيعه = ولا يفقد الرديان يا كود رديان
ما رحت أدور للمفارق ذريعه = عيب على اللي يتقي عقب ما بان
والسر يلقى في البشر من يشيعه = باكر تعرف السالفه دون نقصان

كلمات الشاعر / صلاح العرجاني ,

المصدر: الملتقى الجماهيري للشاعر محمد بن فطيس المري