أيــام يــاشــلال شهــبٍ شواحــيف = من حلـوها تأخــذ ومــرٍ تذوقــه
البارحة نومي علــى حـافة الحِيــف = والجفن ماطبق على النــوم موقــه
يلف قـلــبي مثل حــد المـراهيــف = من كثـــر مابه مـاتـرقع فتــوقــه
يبست رياضـه والضمايــر مواجــيف = من لاهبٍ حامي هبــوبه تســوقه
همٍ يلح القلـــب بالعنـــف تعنيــف = لــح الركـاب اللي يدينه تعوقــه
مع درب شيـخٍ عاديــاتٍ مــناكيــف = قبل طلوع الفجر يبدي شعــوقـه
يــاالله يـامنشـــي مـــزونٍ مقانيــف = منشي السحاب اللي تلاعج بروقه
تشفي مريضٍ طال شكــواه ومخيــف = الجسم نــافد مابقــى إلا عــروقه
راح اللحم وعظــام جسمه مناحيــف = غارت عيــونٍ للمراجــل شبــوقه
نحف كما جذعٍ نحف عوده الهيــف = عقب الثمر يبست سـنابل عـذوقه
جيت الطبيب وسلت عن حالته كيف = واخــبر بحاله والظــروف معزوقه
واطلب رضا الله وأحسن الظن ماعيف = ولا به صعــيب إلا يد الله فــوقه
حــرٍ عرضــله في طــلوعه صواديــف = من عين رمايٍ عيــونه شـــــفوقه
حــرٍ بــراســه لسطــارة زعانــيــف = يوم استوى طلعه وفكت سبــوقـه
عسى عيونٍ شرها بالحســد شيـــف = تنعاق بالأسـباب قبـــل تعوقـــه
تقصف عساها لـلسيــوف القواصيف = تقطع جذور أسبــابها من عمــوقه
الأمر للي صرف الكــون تصــريـــف = والعبد له في قـدرته حــد طوقــــه
دنــيا شقـــية في كدرهــا تكاليـــف = تضحك لصاحــبها ويومٍ تبــوقــه
كم فرقت من جمع شـمل المواليــف = وتزهق نفوسٍ من كــدرها زهوقـــه
همٍ يِلهف مهجة القـــلب تلهـــيف =في صم جدران الضماير شقـــوقــه
غلف على كثر الهواجيس تغـلــيف = بيبان قلبي والضمـاير طـــروقــــه
أصبر وأصابر لو بقلبي كما اللـــيف = اصبر لصـكات الزمــان الصـفوقـــه

المصدر: الملتقى الجماهيري للشاعر محمد بن فطيس المري