الملتقى الجماهيري للشاعر محمد بن فطيس المري - عرض مشاركة واحدة

09-18-2012, 04:45 AM

ألــوه يــا خوك طرّف لي معك طــرّيس
والا اســمـع اللي بقول ومـا يهوجس لي

عـــمـا يــدس الخفوق ومـا يـــزرّ الكيس
هــم ٍ يــــوزّي به الــغربـي لا نسنس لي

ألك الســـلامـــة وهمي جـــالـــه التنفيس
وعـــز الله أنـــي كبته لــيــن كــــدّس لي

ضـيــق ٍ مصـــلاّه حـدرى قبة التقــويس
في رمــضـة ٍ لا تيمم قـــام يــوسوس لي

تــقــول يـقــرا وينفث داخـــلـي قســيـس
من وين يــومي بقـوس ٍ قــاب يقوّس لي

قبــلــة سليمــان تنحى صـــــومعة بلقيس
مــن دون مــأرب خـذت جني تحسس لي

ســـلام يــا ملتقى مــره ويــــا آل أفطيس
ســـلام والفكــرة إللي جــت تهجرس لي

معنــاي ذروة سنــامـه من ذرى التسييس
مــا جيت بــه من فراغ وقمت أوجّس لي

عكـــازتــي بـــاليــه من عايث التسويس
واشــوف سد المــــآرب مــــا تسوّس لي

عـــرش ٍ بلا ســـاس يبلا بــوّل التأسيس
وجــســم ٍ بـــلا راس ميت ٍ لو ترأس لي

وحــظ ٍ بـــلا وفق كنه حية أم أجـــريس
يــرقـص ذنبها وضرس السم يضرس لي

والــــذربه أللي خذت قلبي وسـرت أهيس
تــهــويســة الــذيـــب فــي قفر ٍ تهيّس لي

وجــــدي عليــهــا وجـود ٍ ملّه وتقـــديس
وصـــلاة ربــي على وجـــه ٍ تمـــيّس لي

أم ٍلخــمس الصفـــات أللي عليهــــا قـِيِس
شطر ٍ يــــــوسّف لها وشطر ٍ يحدّس لي

فلقـــة وفـــجــة وســـاتر جسمها السنديس
ومـــخــــدّرة رمـــــش عين ٍ لا تنكّس لي

وخــصر ٍ لـيا خــمته خمس ٍ على تخميس
زادة على الخمس خمس وجـــت تفرّس لي

هـــــذا وجــــودي عليها لا غـدى الفريس
و أقنب لـــهــا من ضميري علّ تونس لي

أقفت ولا عـــــاد بـــاقـي فالدروب وديس
إلا ومـــريـــت فيـــهـــــا بــــــا تعسس لي

هـــــــذا خبرهــــا وهمي جـــــالـه التنفيس
وعـــــز الله انـــــــــي كبته لين وسوس لي
عامر صالح ال شنيف