السلام عليكم ورحمة الله وبركاتة
هاذي ابيات متواضعه واتمنى ان تنال اعجابكم
النوم يامشعل مجافي عيوني
كنّي انا وياه عدوان واخصام
وليل الشتاء ياخيك هيض شجوني
يعزف على جرحي تقاسيم وانغانم
جرح(ن) معنيني ولو تجهلوني
وسمه على قلبي مثل كي ميسام
سبة فراق اللي ملا كل كوني
واعمى عيوني عن هل الشرق والشام
اغليه بدّ الخلق لو يزعلوني
الاصحاب مني او خوالي والاعمام
ومافيه عقبه من سأل ويش لوني
واضح علي... ماني بطيب ومنضام
لاحدن يقول اسمه ولو تمزحوني
ذكره يعنّي خافق(ن) مابعد شام
جرحه وطيفه .. عادهم يوصلوني
واللي عليه العلم.. جافي من العام
بصبر على بعده ولو يعذلوني
وبشب نار الشوق ولاني بملام
وان كان شفته يارفيقي وعوني
قله ترا خلّك من الضيم مانام
وقله على عهدك ليومك يصوني
لكّن لاتجعل صدودك بالاعوام
وسلامتكم
