السلام عليكم ورحمة الله وبركاته
صباح / مساء
الخير
.
.
.
.
مع احترامي للرجال اللي تشبّه بـ الرجال
أحدن بها ما قد درا .. ويسلم بها من قد درا
ما دام وصلت للخشوم و لا ورا خشمي مجال
يعني ترا اللي بـ الثرا أطيب من اللي عـ الثرا !!
لا بارك الله بـ الرجال اللي ما تذرا كـ الجبال
صلفن ليا مال الزمن تلقى تحت ظله ذرا
ما هو مثل من تعتزي به قال : يا ولد الحلال !!
عقّب صبين لا نخيته قال قول و لا ترا
الاوّله تلقى الشحم / و الهيل في وسط الدلال
و الثانيه ما تنثني لا يلتفت شبحك ورا
خلك كماه و لا تدون و لا تقول : الحظ مال
مثلك ليا من مال به حظه يحيلوا ابه الكرا
يا صوتي المبحوح جاوبني ابي رد السوال ؟
انا تعبت من السوال اللي فرا ضلوعي فرا
في راسي الكوكب كذا أشياء من رسم الخيال
ماني بـ قايل أغلبه لكن / هذا اللي جرا ؟!
أعباء تثقل كاهلي ما هي بـ للطارف محال
كم شال سمحان الحمل كنه على المتن اشعرا
الصبر .. بنك الاغنياء اليا بغينا الصبر مال
واليا رجعنا للحقيقه كل خلق الله افقرا !!
الروح تتيتم و انا يتيم من بعض الكمال
لله درك يا الشعر سويت حاجه لمن قرا
البارحه شكل المطر مدعاة رؤيه للجمال
ما ادري تبخر ذا البحر و الا عيوني تمطرا ؟!
لكنْ / يا صوت البحر أدري بـ أنك لا تزال
تشكي و انا اشكي مير لله البقى و للهْ البرا
وما دام وصلت للخشوم و لا ورا خشمي مجال
يعني ترا اللي بـ الثرا أطيب من اللي عـ الثرا
