الملتقى الجماهيري للشاعر محمد بن فطيس المري - عرض مشاركة واحدة

الاوسمة · #1 12-27-2012, 07:11 AM

غر المزون

غر المزون
----------
سعيّد العمودي

.

جتنا من المنشى تساوق لها صوت

غر المزون اللي تضج برعدها

يسوقه اللي جار عبده من الحوت

عظيم ترجيه البشر في كمدها

لافلسفة شاعر ولاسحر هاروت

صوره من الخالق تجلت وحدها

الواحد المعبود وحده ملكوت

الناس من ما مهينٍ وجدها

جبار مافوقه عظيم وجباروت

محيط مافي الارض محصي عددها

غاث البلاد اللي خذا لونها الموت

صارت تماري بالحيا من سعدها

مده ولامدات ممسك وطاغوت

هامور وسهوم المصارف عبدها

ماله مفرق بين لندن وبيروت

واللي عرف مداتهم ماحمدها

اللى ورا الشاشات كشخات وبشوت

وان رزتها شفت العيون ورمدها

ناس يحركها من الكبر ريموت

مواردٍ ماتسقي اللي وردها

والصبر في بعض المواقيف ممقوت

يقطع رجال ماتوفي وعدها

وانا بصدري كنها عين جالوت

خيل تغير وخيلٍ امروادها !

بيدي حبال النور والحبل مفلوت

وعذرت ماصاب الخلوج وولدها

قريت رغم الطلسمه سر منحوت

يحكي مراحل سيرةٍ منتقدها

ياطولها صحرا وضلعان وخبوت

يموت متن السالفه من سندها

ايام والاّ عام والصوت مكبوت

مرت سنيني ماخذتني بيدها

وقفت شاهدٍ بين الاجيال مبهوت

من دمعة المولد لدمعة لحدها

آمالنا فيروز لولو وياقوت

كم صفقةٍ جن الخيال وعقدها

يقضي شريط العمر وحروفي سكوت

حتى قصيدي سيرتي ماسردها

دام البطل اصبح مطبّل وهلفوت

فال المكارم وقتها يضطهدها

احسن تروح اعمارنا كلها فوت

ولاتعل اخبارنا من رصدها

في هالزمن صوتك طبيعي بلاصوت

ليت النوايا كفنت في مهدها

بعض النواحي مالنا يمها قوت

عفناه والدنيا مريرٍ جهدها

نصد واللعبه قوانين وكروت

والناس ملك الخالق اللي وجدها

.
المصدر: الملتقى الجماهيري للشاعر محمد بن فطيس المري