السلام عليكم ورحمة الله وبركاتة
اول شي
بيض الله وجه اخوي عامر ال شنيف على مساعدتي
للوصول للأخ و الاكثر من أخ / الشاعر سعيد بن محمد القحطاني
ثاني شي
انا كتبت ابيات من قبل ما أتواصل مع الاخ ابو محمد
فبعد التواصل ارسلتها له ورد علي
وحبيت اقدم لكم الابيات
اقول انا
سلام ياصقر قحطان المسميّن
يابومحمد مبطي(ن) عن علومك
دورت لك من صار ذا الدرب دربين
وادور الجــرّه وادور رقومــك
الدار قفر ولابها كود رجلين
ومافيه شخص(ن) يالسنافي يلومك
اللاش لاش ان صار فالعلم علمين
امحزّم(ن) بسلاح يومه يهومك
لو انها بمقابل(ن) فالميادين !!
تراعدت رجليه من فعل قومك
وان كانها بمصامخ الشعر .. مسكين
ان كان بيّن في خشيمه وسومك
مدام ماهو من وريث السلاطين
محدن يحسبه شيخ لو رام رومك
ربع الخلا ضايق علي ياحمر العين
ويازين والله شومة(ن) مثل شومك
ابتبعك من بين خضر البساتين
بهمل الديره وبآحوم حومك
وكان رد ابو محمد
يامرحبا مليون ترحيب واهلين
من قبل لانشد حضرتك ويش قومك
ترحيبة غالين(ن) من البعد لافين
لاعل يومي يافتى قبل يومك
يالطيب الوافي عسى يومك سنين
واثني لك الترحيب وآقف قدومك
العمر مره والعزيمه جناحين
وانا عزومي تقتبس من عزومك
النفس ماتصبر على المشرب الشين
واكثر الاماني ماتحقق حلومك
الناس ياظافر سوات الشياطين
لو كانو اصحابك تراهم خصومك
وانته وانا نبقى على السلم وآفين
والبرق برقك والمطر من غيومك
لاماعليكم زود بالعسر واللين
محدن سبح سبحك ولاعام عومك
صبيان يام مطوعين المجانين
يابحر من ينطح عواتي طمومك
انا رفيقك والوفاء بيننا دين
وجاتك علومي زيّن الله علومك
وسلامتكم جميع
وفمــــــــــان الله
