النــــص

جيت المكان وصاحت جروحي هناك
كن الزوايا تحتضر لعنبوها

مشيت اساير خطوتي مير ذكراك
دفنتها لكن جروحي لقوها

دورت لجروحي عذر عن سواياك
لقيتهم هم اول اللي نفوها

ليت المكان اللي جمعني بشرواك
ياليت عمدانه بقت مابنوها

ليت الزمن يرجع ورا واتحاشاك
وارتاح من هالمسئله كلبوها

ماكان شفت العبره اللي تباطاك
العبره اللي كلهم لاحظوها

تبي تسميها ضريبة خطاياك
تسلم يدينك سمها وانت ابوها

طفل الغلا اللي مات برضاه لرضاك
والفرحه اللي بالمهد كفنوها

والكلمه اللي قلتها قبل فرقاك
ماظن قيلت بالهوى واسمعوها

طوفتها كرمال عينك ولاجاك
مني عتب لين الجروح اكتموها

قلت العمر واحد عسى العمر يفداك
نسيتها مدري جروحي نسوها

ابطيت وايتام المشاعر تحراك
وابطو وهم في صدمتك ماوعوها

حتى الحياه اللي حلت يوم لقياك
مستخسره فيني فرح لعنبوها

هذي قصيده واسعد الله ممساك
كتبتها وانت اول اللي قروها

الشاعر / عيد غازي الرشيدي ..
اداء / علي البريكي ..
تصميم / محمد برعص الماجدي ..