بسم الله الرحمن الرحيم
آسف على التاخير بس المعذره منكم
اليوم اقدم لكم هاذي الرديه وكان الوالد طول الله بعمره البادي وسببها موقف له مع شاب صغير بسنه في احد الحدائق كبير بفعله كان حاب يساعد الشايب توصيله او تقديم اي مساعده ظنا منه ان الشايب تايه او محتاج مساعده
يقول ابوي
يالي على الشايب حدتك الحميا
ياعل تحمى من جميع الصواديف
تبي تقوم بواجبه مير عيا
ماله لزوم في كثير التكاليف
من ضيقة الخاطر جلوسي هنيا
مابه مسايير لربع على الكيف
امضي ايامي على هالسويا
ولاني على الدنيا كثير التحاسيف
وان زانت الايام والى بليا
قد عذبت قدمي سغيدان وحنيف
وهذا ردي على ابوي
بسم الذي وان راد شي تهيا
سبحان من بيده جميع التصاريف
ياحي قاف العود مابه كنيا
الي جعل غشام دمعه ذواريف
قاف له الخفاق رحب وحيا
ياحي قاف من رجال عواريف
يابوي ليت المال عندي مهيا
لجعل مصيفك وسط باريس وجنيف
واشري من الخيل الاصايل عبيا
واحط لك ذود على غاية الكيف
مير البلا ماعاد فيها مليا
خاب الرجاء من فتحتي للمظاريف
وسلامتكم
