الملتقى الجماهيري للشاعر محمد بن فطيس المري - عرض مشاركة واحدة

#1 12-09-2015, 07:27 PM

وصف وتجارب

.

الله على جيبٍ يقص الوطا قص

جيبٍ جديد مجهّزٍ للتضاريس

صناعته في مثل هذي مخصص

ما يحسب احساب الوعر والتغاريس

يقص في ممشاه الاطعاس ويرص

رص المجنزر لا مشاء فالطعاميس

من شاس والاَّ من جيوب المقفص

من وارد اليابان ختم القراطيس

مصممه من كان في صنعه ابخص

مثل القصيد اليا ارتكاله كديميس

ولا كما بن عون لا سنّد النص

والاَّ الجذع لا جاب زين الهجاريس

ما فيه شيء من المزايا منقّص

فل المزايا فل حسب المقاييس

يعجبك في ممشاه وليا وقف نص

والنور برقٍ ساطعٍ فالفوانيس

شاشات وارقامٍ تلامع كما الفص

والماركه منقوشةٍ فالتلابيس

اما بلون الذيب والا ابيض ابرص

وكلٍ بشف اللون يختار ويقيس

دايم البدوان واللي تقنّص

واللي يبا بعد الدير والمراميس

غالي ويستاهل لكن ليت يرخص

ويظفر به اللي في زمانه عواكيس

عقب الزمان الشين يلقاله فرص

ويسلا عن هموم الضلوع المقاويس

دنيا العنا معطيته دروس وحصص

تعطي دروس مسجله فالكراريس

دنيا المذلّه تجبره لو تحرّص

وهذي هي الدنيا هموم وتواعيس

لو تصفي أيامك قفاها تنغّص

وحنَّا مع الدنيا طروش وعواسيس

وهذا الصحيح اللِّي نظمته على اص

وصف وتجارب حضّرتها الهواجيس

أوجزت فيما قلت شرحٍ ملخّصْ

فيه المعاني مثل طلع القرانيس

واختم بيوت الشعر قبل انترخص

وصلّوا على محمد عداد النسانيس

-

عبدالله بن ذيب أبوسباحه العصيمي

.

المصدر: الملتقى الجماهيري للشاعر محمد بن فطيس المري