يسعد صباحك يا صباح العصافير=يا معطرٍ مرج الغلا من طيوبك
سافرت بشموسك نهار الأعاصير=ولا عملت حساب لحظة غروبك
سبحان من سخر لك القلب تسخير=معي وكنه خالقه في جنوبك
تعبت أقول لضيق بالي : حصل خير=وارجع الملم حيرتي من سهوبك
يخلف على أم اللي خذته المقادير=من ليله الهادي لساحة حروبك
نام وخياله حاضنك دون تفكير=وقام ولقى قلبه معاك متشوبك
لا بحرت بأهدابك تضيع التعابير=ومن وين مالقيت وجهي مغلوبك
لو شفتني أضحك مع الناس وأسير=حرام ما أذكر فيهم اللي ينوبك
ودي أحبك لين ما دري وش يصير=وإن غبت عني ..!! تو دوبي ودوبك
وودي تزاعلني ولا ألقى معاذير=وأخلي عيوني معك لا التهو بك
أنت المرابع والنفل والنواوير=واللي تَعَلّم نشوتك ما يتوبك
وإنت الهنا وإنت المُنى والتباشير=وأنت النسيم اللي يداوي هبوبك
وأنت التجارة والربح والمخاسير=والراس مال اللي برصيد محسوبك
وإنت المسافة والحسافة وأنا غير=كل الخطاوي اللي مشت في دروبك
وانت الأمير اللي خلقه الله أمير=في ضحكتك في مشيتك في أسلوبك
وأنت الحكومة والأمن والمحاذير=سايق عليك الله ترحم شعوبك