رد: مجموعة قصائد للشاعر / أحمد الناصر الشايع
.
.
يامل عين الى جا الليل عيت لاتنام
تكثر عليها الروابع يامعين الصابرين
من عقب ما استبشرت بالنور وانجال الظلام
شافت من الغيظ مايملي نظرها مرتين
لا وهني المعافى مايلوم ولا يلام
مستانس لو يزين الوقت ولا مايزين
ماذاق مر الفراق وفارقه حلو الغرام
والولف ملاك ما يحتاج عراف وظمين
الصاحب اللي هدب عينه مثل ريش النعام
ما يلتفت مع طريقه من يسار ومن يمين
اكبر مصيبه ليا سلمت ما رد السلام
مدري وش اللي خطر في بال وضاح الجبين
إن كان لك يا اشقر المجدول في هجري مرام
صبرت صبر الجمل بارضاك لو ضلعي متين
الموجب انه ملكني حب مردوع الوشام
لا خير في عشرتن ما هيب في حرزن مكين
هو حق ياللي تعرفون الحلال امن الحرام
يسهر عيوني ويدعي سري الخافي يبين
العشرة الصافية تقود أهلها بالخزام
ما تختلف عشرة الغالي على طول السنين
وان كان عقب البطا فك اللحام من اللحام
ما عاش أبو نية وحدة مع أبو نيتين
ياصاحبي ما تساون الغوارب والسنام
من خف ميزان قدره لو قلبه ذهين
لو شفت منك الجفا مارضى على عيني تضام
قطعت منك الرجا كنك مع الميتين
-
#شعر
( #احمد_الناصر_الشايع )
|
