بسم الله الرحمن الرحيم
السلام عليكم ورحمة الله وبركاته
.....
عقبال ياماخذ فؤادي مية عام
ضيعتني منك وانا ما اهتديتك
لا ما نسيتك.. كيف ابنساك مادام
ذكرى الفراق تهزني لو نسيتك
حبك قدر وانا على دين الإسلام
مكتوب في وجه الجبين ورضيتك
ولك منزل في نايف القلب وخيام
وذود الغلا ترعاه ولا شكيتك
يفطر عليك القلب وبمفارقك صام
والله لو انك شوك سدره كليتك
القلب طير لا دعي للهوى حام
والا انت وكره من كثر ما هويتك
كن العيون من النظر عقبك ايتام
وكني ماريت إلا انت من يوم ريتك
وكنك معي وانا فقدتك من اعوام
معا الخيال القاك كني لقيتك
من صعب وصلك ماتهنيتك احلام
لا جابتك فزيت شوق ومحيتك
يعني وصالك صعب واهدافي اوهام
يعني زرعتك للقدر ماجنيتك
صبرن يقولون العرب كل الايام
يوم عليك ويوم لا جاك جيتك
وياقلب ياللي ورثك جروح والآم
بليتني ماهوب انا للي بليتك
ولعتني من عادني في الهوى خام
واسرفت بي وانا خطامك عطيتك
طعتك وزدت طاعتك هم وهيام
مالله كتبلي واستخرت وعصيتك
لو للقلوب اسواق بايع وسوام
لابدلك وان جيتني ما شريتك
والا انت ياللي جيش عينيك مقدام
لا اقنعت منك والرجاء مارجيتك
كني سجين بين إفراج وإعدام
وكنك سجن وانا بنفسي بنيتك
وعقب الوصال اللي على عين من لام
قده يكفيني عن الوصل صيتك
وقدني اليا مريت بالشارع العام
لبيت مما فالضمير ودعيتك
ادري ان صوتي ماقطع عشرة اقدام
وادري بي اعود الى من نصيتك
ياشينها يامحني (ن) راس الابهام
مااقدر على شوفك وانا عند بيتك
تقبلوا تحياتي ....
