من قصائد الشاعر / #محمد_الشهري

من قصائد الشاعر / #محمد_الشهري

* تفاصيل مسراي *



ناداني الهاجس وجيته من اقصاي

ما ادري شقاوة عشق ولاّ شهامة

سريت مثل الحزن في نغمة الناي

من غير ما انشد وين درب السلامة

جيته بقايا صبر ما احسّب خطاي

أجفل عن الموذين واهل النمامة

من شان بعض الناس ما تسمع حكاي

لا جيت اقول اللي يليق بمقامه

يا نشوة الماضي، ويا بهجة الجاي

ما عاد يجدي البوح طول اعتصامه

هذا انت شفت اشلون عايش بمنفاي

ما بين همّي والنصيب وخصامه

في غربتي ما شفت من زحمة مناي

إلاّ تباريح الهوى وانتقامه

أزريت اوالف بين وضعي وهقواي

نوبٍ ضيا شمعة، ونوبٍ عتامة

تاهت ظنوني بين بيعي ومشراي

ما بين تجميع الرجا وانقسامه

هذي ملامح من تفاصيل مسراي

البارحة في غفلة اهل الملامة

-
#شعر /
#محمد_الشهري


.

المصدر: الملتقى الجماهيري للشاعر محمد بن فطيس المري