لاهب نسناس الهوى نبته ايميل

لاهب نسناس الهوى نبته ايميل

اسعد الله اوقاتكم بالخير
هذي ابيات كتبتها ايام الأمطار العام الماضي ونقول الله يجيب الربيع ان شاء الله

كريم يابرقاً سرى بأخر الليل=يم الديار اللي ذبحني غلاها
نسناسها شرقي وابسهولها سيل=لبى مراتعها ونسمة هواها
عسى الصحاري تبتهج عشب وأيضيل=نبتاً يرد اللي بوقته جفاها
وتشوف راع الذود من غيرها ايشيل=طاح الربيع وسلوة الروح جاها
لاهب نسناس الهوى نبته أيميل=خضراء ترد الروح والله كساها
تبري عليلاَ ذاق مر البهاذيل=يشقى ويسلى بالشقى من عناها
ماله جدا غير الشعر والمواوييل=وبنفسه لوازم عاجزاً ماقضاها
هذي هي الدنيا مقافي مقابيل=فيها كرم فيها بخل من عطاها
لاقلت جرحاً في فؤادي بدأ ايزيل=ردت علي نفساً تزايد بلاها
(( أم العيون الفاتنه والمضاليل=اللي مرضها يشتكي من دواها))
يانفس خليني طفح فيني الكيل=خلي خفوقاً راح واقفى وراها
اقفى واشوفه عاثراً بالمحابيل=مجروح يبكي هايماً في رجاها
(( ايوالله اني بالهواء طحت بالحيل=ونفسي صروف الوقت بين خفاها))

اخوكم هياف السبيعي

المصدر: الملتقى الجماهيري للشاعر محمد بن فطيس المري