قصيدة رثاء ويقفاها فتره انقطاع - الملتقى الجماهيري للشاعر محمد بن فطيس المري

#1 02-19-2012, 10:38 PM

بسم الله الرحمن الرحيم
مساءكم شعر ... الليله بأعطيكم قصيده مرثيه بوالدي الذي وافته المنيه بشهر رمضان الفايت ولكن ولله الحمد كانت الخاتمه : صائم .. معتمر ..مصلي صلاة الفجر ... وناطق الشهادة ... وزود على هذا كله متوفي بالحرم ودفنّاه بمقبره لا تبعد حوالي 150 متر من المسجد الحرام ومصلين عليه مصلين الحرم بيوم اثنين رمضان قبل صلاة التراويح ... وجميع ماذكرت هو اللي جعل فاجعته عليّ أخف من المتوقع...
وكنت من أكبر شعراء الغزل بقبيلتي لكن بعد وفاته اختفيت والاعضاء كلهم يقولون سمعنا قصيد لكن والله مالنا بالحزن لكن حبينا نسمعكم هالمرثيه وناخذ منكم فتره..وكانت قبل عيد الاضحى ..

ياوالدي باقي على العيد كم يوم ... ولا عاد عيد من فراقك ويومه
الخاطر اللي عقب فرقاك مهموم ... ماله سبيل في مفارق همومه
يظهر على عين العرب قوة عزوم ... طير كسير وجبر كسره عزومه
وهو لو إنه هدها ما لحق لوم ... من شاف كسره ظنتي ما يلومه
يونّ تالي الليل ويوّن ويقوم ... قومة كبير زاد وقته ظيومه
داري بإنه شي محكم ومقسوم ... وراضي بحكم الله وموجع قسومه
لكن له حلمٍ مفاده يجي يوم ... يجلس مع عوده وياخذ علومه
مرحوم يا شيخ ليا قلت مرحوم ... لو كنت واقف طحت من غير قومه
لاني ما اصدق قولهم مت محسوم ... كني غريق في بحر حلم نومه
كني غريرٍ إمتلى قلبه هموم ... أبوه مناه وترقب قدومه
لكن للدنيا تقاليد وسلوم ... منها نقع من دمع عينه كمومه
يا بري حال ودمع عين وملا قوم ... يا وقتي اللي قبل تنفح سمومه
انا أشهد إني عشت في جال زيزوم ... ركنٍ على الشدات منصى لقومه
ما خاب من جاله من الوقت مضيوم ...من فقر والا ضايمينه خصوم
علمني إن الناس معطى ومحروم ... وكل عطاه الله ذلولٍ زحومه
من طاب من طيبة ذلوله على الدوم ... نذرٍ عليّ إن ياصل اللي يرومه
ومن خاب من خيبة ذلوله فمحشوم ... من كل طيب ويردي الله سهومه
وعلمني ان القوم من قايد القوم ... واقسى النشايب نشبة أبناءالعمومه
تقبلوا تحيات ...عبدالرحمن عبدالمحسن القحطاني
اعتذر عن نسيان البيت الاول الذي تم تعديل مؤخرا...

المصدر: الملتقى الجماهيري للشاعر محمد بن فطيس المري

الذين يشاهدون محتوى الموضوع الآن : 1 ( الأعضاء 0 والزوار 1)