قصيدة وضع الشعر لـ ياسر السليس

قصيدة وضع الشعر لـ ياسر السليس

السلام عليكم ورحمة الله وبركاته

أعزائي أعضاء وزوار
ملتقى الشاعر محمد بن فطيس

أقدم لكم قصيدة بـ عنوان : وضع الشعر
لـ الشاعر : ياسر السليس

صار وضع الشعر كله في دبور=وأشهد إنه ضايعٍ وسط الزحام
عقب ناسٍ زيفت صدق الشعور=وتاجرت بالشعر في سوق الحرام
يمدحون أهل السفاسف والفجور=ويجعلون الخاين من أهل المقام
في بلاط أهل المناصب والقصور=يصلبون الشعر من فوق الرخام
وعقب ناسٍ نافقت لجل الظهور=تمشي خطاهم على عكس النظام
ومن تخلف عن قوانين المرور=لا غرابة لو تعرض لاصطدام
وبعضهم كذاب مختالٍ فخور=بالدراهم يشري شعور الانام
لجل يحظى بالاشاده والحضور=ما درى إنه يفتقد للاحترام
قال أنا لي في جزيل الشعر دور=ومن عيون الشعر صوبت السهام
عيون شعرك ياسقيم القاف عور=ماتميز بين يام وبين شام
اسمعوني يا مقرعة القدور=وافهموني يا خفافيش الظلام
فرق شهر الصوم عن باقي الشهور=مثل فرق الشعر عن باقي الكلام
القصيدة فِلك في غب البحور=وكل مركب ما وصل بر السلام
يصطدم في بعضها صم الصخور=ويهلك الربان من بين الحطام
والقصيدة لفظ في معنى وشعور=ولحنٍ أعذب من تراتيل الحمام
وبعضها تقراه من بين السطور=مثل نور البدر من خلف الغمام
والأدب فكر ورسالة دون زور=يحفظ أمجاد الخلايق والأنام
استمع للشعر في ماضي العصور=في دواوين الفصاحة والعوام
تدرك الفارق وتفهم ما يدور=وتعرف إنا أمةٍ عكس النظام

أخوكم : سيف السليس

المصدر: الملتقى الجماهيري للشاعر محمد بن فطيس المري