لقيت الناس ما منهم سلامه

لقيت الناس ما منهم سلامه

.



لقيت الناس ما منهم سلامه

لزوم يلحقك منهم ملامه

ولا تحسب حلالك لو تبيده

يبي يحماك عن هرج الفدامه

بذرت الجود في من لا جزاني

سوى ذم إلا هبت ولامه

حقود القلب نقال الوشايا

هذور سهمته نقل النمامه

إلا منه طرى له ما طرى له

تكلم مايثمن وش كلامه

يقوله يزعم إنه مازح به

وهو ينقض ويفتل في عدامه

دخيل الله من خطو السملق

الى بالهيذوان اطلق لجامه

ألا ياليت ربي يوم سوى

عبيده حط للطيب علامه

لى شان الذي بالناس جاهل

يعرف الحر من برق الجهامه

لأجل بالناس شيطان ملبس

ولو لوى على راسه عمامه

يغرك بالسلام وبالتحفي

وهو شيح وجثجاث طمامه

مثل هذا تحذر منه جدا

ولاتدني منامك من منامه

وبعض الناس في ممشاه رافض

يختل الناس في قل اهتمامه

وبعض الناس يبدي لك نصيحه

ولكن ماتعرفه وش مرامه

وهو ما مقصده نصح ولكن

يبي يلبسك للحاجه خطامه

وإلى منه قضى بك ما يريده

أخذ سدك وضربك المهامه

وبعض الناس يوري لك محبه

وارق من البريسم في كلامه

إلى قام يتمسكن بالتلفظ

تقول اطهر واصح من الحمامه

وبعض الناس محمود السجايا

رقى العليا بعزمه والتزامه

إلى منه بدى لك فيه لازم

قضى لازمك ما ثمن حطامه

كمنه وافي في كل خصله

عريب الجد خاله من عمامه

أسأل الله يرفع كل خير

عن الخذلان لا يهفى مقامه

قضى نظمي وما لاق بضميري

حلات القيل مبداته ختامه

أقول الناس مشكاهم على الله

لزوم يلحقك منهم ملامه

-

إبراهيم المزيد - رحمه الله


.

المصدر: الملتقى الجماهيري للشاعر محمد بن فطيس المري

صح لسانك ... واقع مرير نعيشه
ما يتفع الطيب هالايام ..