|[ حوآر على مآئده الافطآر .. ضيفنآ الأول .. " سآري " .!

|[ حوآر على مآئده الافطآر .. ضيفنآ الأول .. " سآري " .!

السلام عليكم مسآء الخير حيآكم الله فِ ذآ , اليوم جيت ومعي ضيف رآح يستمر معنآ الضيف 48 سآعه يعني يومين ماوصيكم , الله الله فيه أهروه بالأسأله وعشان شسمونه ياليت ترآجعون القوآنين فِ الموضوع المطقوق بمسمآر لآني نآويه مآ أرحم أحد , بلآ بحذف ولاني برآجعه لحد ضيفنآ هو : " المرآقب " المُميز بعطآئه المُستمر , وروحه الطيبه , وتعآونه مع الكل بدون استثنآء |[ سآري ]| حيآك الله ومرحبآ وسهلآ توآجدك كـ أول ضيف يسعدني ويشرفني طآل عمرك

المصدر: الملتقى الجماهيري للشاعر محمد بن فطيس المري

سآري فِ البدآية عرفنآ بنفسك اول شي : الاسم . ســآري الحالة الاجتماعية اعزب احمل شهادة البكالوريس . تخصص ادارة اعمال حالياً في نهاية مرحلة الماجستير .. دعواتكم . طبعاً في نفس المجال ادارة اعمال موظف . من سكان القصيم وبالتحديد باريس نجد . عنيزه الهوايات . السفر . التصوير - ماذا يمثل شهر رمضان بالنسبة لـ سآري؟ بالنسبه لي شهر رمضان شهر مميز . من الاشهر التي ارتاح بها نفسياً انا اعتبر هذا الشهر افضل مافي السنه من ايام . وله اجواء لا توجد في غيره من الايام والاشهر - اذكر لنا العادات والتقاليد المتبعه في محيطك الاجتماعي أثناء الإعداد للشهر الفضيل ؟ عندنا قبل شهر رمضان بفتره يبدون الحريم في الأعداد لهذا الشهر مثلاً عندنا في البيت يتجمعون خواتي الكبار وحريم خواني وخالاتي ويجلسون يحشون سمبوسه و كبه ومطبق . وغيرها من الاطباق همن يتقاسمونها كل بيت ياخذون الي يكفيهم ويحطونها بالفريزر . لين رمضان واذا دخل الشهر بس يطلعون من الفريزر ويقلون . وفيه بعض الاشياء الي يقوم بها بعض اهل الدين من عايلتنا فمثلاً فيه واحد من العايله متكفل كل رمضان بمسابقة . وهي عبارة عن اسئلة توزع على العوايل وتحل وتعلن يوم العيد طبعاً هذي لها طابع خاص وفرحه ما تتخيلونها ودايم جوايزها تكون قيمه بالمره طبعاً اغلب العجز او الحريم الكبار يبدون بتوزيع بعض الاكل على بعض الجيران الفقراء تقريباً هذي ابرز معالم الاستعداد لرمضان في المجتمع المحيط بي - عادات رمضانية تكثر خلال الشهر الفضيل (سلبي وايجابي) ؟؟ السلبيه : 1- كثرة الاكل والموائد في رمضان وهذا اسراف منهي عنه 2- السهر لساعات الصباح وبعض الناس ما ينام الا عشر والا الظهر ويسحب على الصلاوات الايجابيات : 1- الحرص على صلاوات التراويح والقيام 2- الاكثار من قراءة القران 3- كثرة الصدقات 4- تزايد في التواصل الاجتماعي خلال هذا الشهر بشكل ملحوظ - كيف تكون يومياتك خلال شهر رمضان من اول ساعه تصحو بها الى ان يحين وقت نومك؟ طبعاً انا هذي السنه دوامي صباحي غير عن الاعوام الماضيه فجدولي يكون على النحو التالي اصحى من النوم الساعة 10 الصبح واروح الدوام ولا ارجع الا 4 العصر طبعاً لمن ارجع العصر البيت يكون جدولي مو واحد . مرات اقعد على النت لين وقت الفطور . ومرات اقعد اقراء قران لين الفطور .وقليل ما انام قبل الفطور بشوي اروح على رجولي لفران الحراه وامسك سرا عليه علشان احصل على خبر حار للفطور . بعدها يأذن المغرب وافطر . ونصلي المغرب وارجع اجلس مع اهلي شوي بعدين نطلع للمسجد ونصلي فيه العشاء والتراويح بعد كذا ارجع البيت على الساعة 10 انام لين الفجر اصحى 3 اتسحر واصلي الفجر واجلس على النت لين تقريباً 6 وانام طبعاً هذا جدول تقريباً ويختلف من يوم لأخر - صف لنا اول سفرة افطار لهذا العام ؟؟ وماهي وجبتك المفضلة على السحور والإفطار؟؟ طبعاً مثل كل سنه رمضان عندنا في البيت يبداء بالتدريج . اول سفره كانت بسيطه جداً عليها فطاير وسمبوسه وقشطه وتمر وعصير .فقط الحين تطورنا شوي وصار فيه حركات ومرات مكرونه ومرات شوربه طبعاً على الفطور انا اهم شي عندي اثنين . قشطه . والفيمتو . ما اتخيل اني افطر من دونهم اما بالنسبه للسحور انا يهمني الماء ولا عمري تسحرت اصلاً من بدا رمضان - مشروبك المفضل على الافطار والسحور؟ على الفطور الفيمتو . ولا احب التانج .. وعلى السحور الماء - موقف طريف او محرج حصل لك أثناء صيامك؟ مره اذكر مع الوالد كنا مسافرين المهم دخلنا مكه على وقت الفطور بالظبط فوقف الوالد بجوار احدى المحطات وجاب لنا فطور من احدى المطاعم الي في المحطه وجلسنا نفطر شوي الا اهل الحاره جايبين لنا فطور وشوية ملابس على بالهم اننا شحاذين . - ذكريات رمضانية لا زالت عالقة في ذهنك؟ ايام الحاره اول احسن من الحين كنا نجتمع ونروح نتمشى في الحواري وكنا نبني لنا مجالس في البرحه حقت الحاره يعني كانت ايام شقاوه بس حلوه اهي احلى مافي رمضان ومن الذكريات الي كانت في رمضان ولا زالت عالقه ايام ما كنا ساكنين في المزرعه فعلاً هذي ايام لا يمكن ان انساها الحين لمن سكنى في المدينة مدري احس تغيرنا كثيييييييير . على انه مافي مسافه بين المزرعه والمدينة . لكن اجواء المزرعه غييييييييييير - متى كان صيامك لـ أول مرة ؟؟ وهل واجهت اي صعوبة او مواقف طريفه خلال تلك الفترة ؟؟ ما اذكر للأمانه بس اتوقع في رابع ابتدائي وكان هناك صعوبات كبير لأنه كان عطش وما كنت اتحمل امممممممممممممممممممممم مره اذكر رحت مع ابوي لأحدى مناطق الجنوب وكان عمري وقتها صغير مره فكان وقت الفطور فكانو حاطين على الفطور حلبه المهم ابوي شافني ما افطر قالي ورى ما تفطر . قلت له يبه هذا يع . قام وهاوشني وطردني وقالي فشلتنا وقالهم لا تشرهون عليه تراه بزر ههههههههههههههههه - هل سبق أن صمت بعيدا عن الأهل ؟؟ اذا كانت الاجابه نعم فما الفارق الذي شكله لك الصيام بعيدا عنهم؟؟ يب سبق وصمت اكثر من مره الفارق ان رمضان ماله طعم ابد ابد ولا نحس بالفطور ابد اذكر كنا نتسكع كل يوم انا وابوي من مطعم لمطعم ليما سافرنا فعلاً وقتها احسست بقيمة اهلي وقيمة الفطور معهم فقدت الجمعه فقدت اخواني وفقدت امي ودعاويها على السفره في رمضان وهذي كانت اكبر ضريبه لمن تكون صديق ابوك - رمضان شهر العبادة لكن في زمن انقلبت فيه الموازين ... مارأيك بهذه المقولة؟؟ ما انقلبت الموازين بذا المعنى ولكن كثرت الملهيات يعني اول ايش كان عندنا غير القناة الاولى والفوازير وطاش اذكر حتى صلاة التراويح كنا نتابعها حقت الحرم وكنا نتابع مع الامام بالمصحف واذكر نتابع ختمة الحرم لكن الحين عندنا عشرين قناه وكل قناة عليها عشرين برنامج لو بفرض اني بتابع كل البرامج اتوقع اني ما بلحق شي وهذا هو الي غير علينا طعم رمضان وروحانيته - هل تحرص على ختم القرآن و اقامة صلاة التراويح ؟ الحمدلله وبعيداً عن الرياء نعم وبالعكس فيه تنافس عندنا في البيت واحلى شي في صلاة التراويح اننا نروح على سيارة وحده كأننا رايحين العيد يعني انا وخواتي واخواني وامي كلنا نروح سواء وهذا جو جميل يحسسني بالسعاده - ما رأيك بكثرة المسلسلات المعروضة خلال شهر رمضان المبارك ؟؟ وكيف تصف نفسك من حيث المتابعة؟ والله كثرتها او قلتها ما تعني شي الاهم ان يكون المضمون ذو فائده لأن الفكاهه الزايده تتحول لسماجه بالنسبه لي انا ما اتابع التلفزيون نهائياً الا اذا مريت ولقيته شغال او كنت في مجلس وكان شغال لكن ما احرص اني اتابعه . لكن انا مطلع على كل ما يصير من حولي من احداث تلفزيونه بحكم اني استخدم البلاك بيري . وفي البلاك لا يخفى شي - مالمسلسل والبرنامج الذي تحرص على متابعته خلال رمضان لهذا العام ؟ لا يوجد - قناتك المفضلة خلال الشهر الفضيل؟؟ لا توجد - لو اوكلت لك ادارة قناة منوعات خلال الشهر الفضيل فما هي اول خطوه ستقوم بها؟؟ وهل من خطوط حمراء؟؟ اتمنى اني ما ادير اي قناة ليس من باب المثالية ولكن ما اعتقد اني بفلح في ادارتها لأني انا اجهل في التلفزيون الكثير لكن لو فرضاً مسكت قناة فأول شي راح اغلقها اوقات الفطور والصلاوات لكي لا اللهي الناس عن عبادتهم - متى تنوي الاستعداد لعيد الفطر المبارك؟؟ بالنسبه لي انا دائماً افصل ثيابي تقريباً في اول اسبوع من رمضان اما بالنسبه للمقاضي فهي قبل دخول العشر الاواخر من رمضان واذا تأخرت فراح تكون اي عصرية من عصريات العشر الاواخر لأني اكره شي اسمه زحمه - العادات و التقاليد المتبعة في محيطك الاجتماعي منذ اعلان هلال شوال وحتى اخر يوم بعيد الفطر المبارك ؟ طبعاً صباح العيد الاول اهو العيد بالنسبه لي اما باقي اليوم فيروح نووووووووم لأننا نكون سهرانين فنصلي العيد ونجتمع في بيت جدي ونسلم على عماني وخوالي لين 11 بعد كذا كلاً يروح بيتهم ونرجع العصر للأستراحة طبعاً احلى مافي العيد كل سنه اهي جمعتنا اول ثلاث ايام العيد وهذي بكل امانه حلاة العيد فنحن عائلة كبييره نستاجر استراحه ثلاث ايام العيد الاولى وكل يوم على اثنين من افراد العائله يكون العشى ونسمر فيها من العصر لين الفجر . سباحة . كوره . بلستيشن . سوالف . مسابقات . اي شي - كلمة أخيرة اخيراً بكل امانه ما توقعت اني بكون متواجد هنا في هذا الشهر الفضيل ولكن من فضل ربي انه جمعني فيكم وللأمانه تشرفت هنا بمعرفت ناس انا اعتبرهم مكسب حقيقي من عالم النت وفي الختام احب اقولكم تقبل الله منا ومنكم صالح الاعمال / سآري الله يعطيك العآفيه , ولآهنت الأن المجآل مفتوح لـ الجميع استلموه

مشكوره سلطانه بس اضنك سئلتي كل الاسئله
ماخليتي لنا شي بس يالله اعصر مخي واطلع اسئله
.................................................. ......
س///هل تئيد الصوم خارج المملكه؟؟؟
س///ماهو طموحك في المستقبل؟؟؟؟
س///حكمتك في الحياه؟؟؟؟؟
اخر سوال ماودي اطول عليك س////لو طلبو منك ان تلقب المنتدى بلقب ماذا ستلقبه؟؟؟

واشكرك من كل قلبي........

اقتباس س///هل تئيد الصوم خارج المملكه؟؟؟

الصوم داخل المملكة او خارجها اهو او ما راح يتغير شي
لكن مثلاً في بعض الدول يكون النهار اطول بكثير من النهار هنا
في بعض الدول يكون الفطور الساعة 9 المساء

لكن هذي الدول اجوائها تساعد
يعني درجات الحراره عندهم ما تتعدى 20

لكن في السعودية ايام الصيف بصراحه الصيام متعب بشكل كبير
والله يكتب الاجر للجميع

اقتباس س///ماهو طموحك في المستقبل؟؟؟؟

بصراحه اكذب عليك لو قلت لك ان عندي طموح معين
لكن حالياً طموحي ان الله يوفقني في الماجستير . واتمنى يكون لي منصب كبير في الشركة بعد ما انهي الماستر

اقتباس س///حكمتك في الحياه؟؟؟؟؟

كلنا كالقمر .. له جانب مظلم

اقتباس اخر سوال ماودي اطول عليك س////لو طلبو منك ان تلقب المنتدى بلقب ماذا ستلقبه؟؟؟

اممممممممممم

سؤال محير بصراحه
امممممممم بصراحه عجزت لا يطلع شي براسي
بس يطلع شي بجي ارد عليك


اشكرك اخوي محمد على اسئلتك اللطيفه الجميله مثل جمال طلتك
تحياتي لك

يعطيك العافيه سلطآنه ع الموضوع

وحيآك أخوي سآري ..وكل عام وانت طيب وبخير
ماشاء الله سلطانه ماخلــت لنا شــي
تسأل بذمه وضمير ..

بما انه اول مره دوامك يكون بنهار رمضــان
هل كان بختيارك و لانظام عملك كذا؟
اول يوم صيآم يكون صعـب شوي ..هل واجهتك صعوبه وشلون كانت ؟


عوآآفي

و ان شاء الله سؤالي كان خفيف

اقتباس وحيآك أخوي سآري ..وكل عام وانت طيب وبخير

اهلين اختي رمق
كل عام وانتي بصحة وسلامة يارب
والله يتقبل منا ومنك صالح الاعمال

اقتباس ماشاء الله سلطانه ماخلــت لنا شــي تسأل بذمه وضمير ..

ايه شفتي اشلون هذي سلطانه لا يغركم برائتها ترها شريره

اقتباس بما انه اول مره دوامك يكون بنهار رمضــان هل كان بختيارك و لانظام عملك كذا؟

بصراحه احنا دوامنا في رمضان فيه فتره مسائية وفيه فتره صباحيه
انا طلبت الفتره الصباحيه برغبتي قلت علشان اتفرغ لنفسي بالمساء

اقتباس اول يوم صيآم يكون صعـب شوي ..هل واجهتك صعوبه وشلون كانت ؟

بصراحه اول يوم مر علي كأنه سنه
طبعاً انا كا العاده ما يتعدل جدولي بسرعه لازم انعفس فوق تحت على بال ما اعدل في نظام حياتي اي شي . فأول يوم من رمضان كنت نايم بدري قبلها علشان متعود على النومه ودوام الصبح بدري . وللأسف صحيت اول يوم من رمضان الصبح الساعة 9 ولا ادري ايش اسوي وفين اروح وكنت جوعان وعطشاااااااااااااان بالمره
وكان اطول يوم في حياتي وانا جالس انتظر الاذان

اقتباس عوآآفي و ان شاء الله سؤالي كان خفيف

حياك اختي رمق اسئلتك كانت مثل طلتك راقية ووميزه
لك ودي واحترامي

::

يعطيك العآفيه ياسلطانه

موُضوع رائع بكل ماتعنيه الكلمه ويستحق المشاركه والتقييم

وحلوُ إنك اخترتي ساري < ناوي أتعبه بـ الأسئله هههههه


ونعم والله ب ساري شخص غالي وأكن له كل محبه وتقدير وضيف يبقى بقلوبنا دائما


تفضل أسئلتي../

1) متى الاوقات الي تقرأ فيها القرآن.؟
2) خبر أفرحك واخر أحزنك خلال شهر رمضان..؟؟
3) ما الفرق بين شهر رمضان الماضي وشهر رمضان الحالي بالنسبه لك.؟


وسلامتك..

اقتباس وحلوُ إنك اخترتي ساري < ناوي أتعبه بـ الأسئله هههههه

افا وانا اقول انت الي تبي تفزع معاااااي

اقتباس ونعم والله ب ساري شخص غالي وأكن له كل محبه وتقدير وضيف يبقى بقلوبنا دائما

ما عليك زود اخوي ويشهد الله على حبي لك وتقديري لشخصك الكريم

اقتباس 1) متى الاوقات الي تقرأ فيها القرآن.؟

اهم وقتين بصراحه الي احب اقراء فيهم قران
الاول في المكتب لمن اروح الدوام مثل ما انتم عارفين الحركه تكون شبه مشلوله فيكون الدوام هادي وافاضي ورايق وهو اكثر وقت اقراء فيه قران
الثانية بعد العصر . لكن مو دايم

اقتباس 2) خبر أفرحك واخر أحزنك خلال شهر رمضان..؟؟

بالنسبه للخبر الي افرحني . تعيين اختي
بالنسبه للخبر الي احزني . وفاة جارتنا .

اقتباس 3) ما الفرق بين شهر رمضان الماضي وشهر رمضان الحالي بالنسبه لك.؟

يعني مافي فرق كبير بس
ممكن رمضان السنه الي فاتت اجمل بحكم انو ما كان حر زي هذي النسه حر موووووت



وحيااااك اخوي احمد

لي عووووووده

اقتباس المشاركة الأصلية كتبت بواسطة الهــــــــوى لي عووووووده

في انتظــــــــار العودة