( خشم الصحافة )

( خشم الصحافة )

العقاب امسابق المشراف في طول الزماني
لو تضيق افكار غيره ما تضايق ستحله
واصطفاف الريش من واليه يازين المعاني

وابتصر القاف يابن فطيس في دقه وجله

ما يخاف الا من الله وهو كائن حي ثاني

وانت مثله ما تخاف الامن الله واذكر الله
والعقاب امصابح المرقب ليا الساعه ثماني

وانت تخلف ساعته والا تجيه بساعة له

كيف تقبل له تهاني لو يقدم لك تهاني

وانت تطرد طير عن مدهل وتدهل مدهل له
العقاب اللي قبالك تشتكي له من حناني

ما شكى لك لو شكى فوق البسيطه كل عله
ما يعرفك لو قرصت ام الفشق وام البطاني

ما يعرف الا الطيور اللي على شلوى مطله
ما يوقع كان شاهد خوف والطائر جباني

ما يحوم الا بدار ولا يعرف الا محله

له مكان وله زمان وله على الدنيا كياني

ما يعد الا النجوم ولا يحسب الاّ الأهله

مرقده في قدرة الله بالفضاء والجو أماني

ما رقد تحت الشجر والا المباني والمظله
كل طير إن مالقى مشراف يلقى له ضماني

منه يكسب ريح روح وينفض الريش ويتله
انت ماطاك الثرى تحت الثريا واليماني

وهو قارات الثريا واليماني قارة ٍ له

ياصل القطب الشمالي والجنوبي مستعاني
كل ما تحت السماء من بر والا بحر دله

العقاب اللي على قطع الخرايم في ثواني

والعقاب اقطع من الحر الطليق بمخلب له

والعقاب اللي على ضرب المثل يعلن علاني

له مثل يكتب على خشم الصحافة والمجله

ما يسمّون الشجاع إلا عليه اسمٍ بياني

واكثر الشعار تقصد بالعقاب ابلا مذله
يا محمد فزت مره بين الأربع من لساني

قال لك شيخ القلوب اللي نحبه ما نمله

وانت الأول واكسب الثاني مع الثالث قراني

ما يحمل اربع بيارق كود شيخ الشعر كله

وهو ابن زايد محمد وانت ضيف له مصاني
قال لك مع شاعر المليون اخذ بيرق وفله

مؤلف ديوان بركان الشعر / محمد هويدي القنيص بن شنيف

المصدر: الملتقى الجماهيري للشاعر محمد بن فطيس المري