لا تغرك ضحكةٍ في فم الطفل الرضيع ,

لا تغرك ضحكةٍ في فم الطفل الرضيع ,

ودع الصبر المخيم على البال الوسيع = وإنتبه لا تطرق إيديك باب المستطاع
هات روس المستحيلات وإقرنهن جميع = أنت جايع والمشاريه من حولك جياع
جعل حظك ينبت الورد ما ينبت ضريع = صرخةٍ من واقع الحال تعطيك إندفاع
خابر إن الضيق في الجاش والقلب الوجيع = ما درت عنه التباريح وكبود الشباع
أمسك الضلع القصير قلم سحر وبديع = والدقل باقي ضلوعك تعلق به شراع
أرسم البسمات والشمس وأزهار الربيع = وأفتخر لو كان ما من عبير ولا شعاع
السنين أوحش من الليل في عين الفجيع = وأكذب من الذمة اللي مخابيها وساع
ليت غايات النفوس العفيفة ما تضيع = بين قلة ذات الأيدي وسطوات السباع
لا رعى الله من تولى سياسات القطيع = إستطاب الجمر والجمر ما يصلح متاع
وين حق الناس مثل المهادي مع سبيع = مزج ما بين التفاني وعلم الإجتماع
ينفطر قلب الحمامه على الغصن الرفيع = والورق يندى محياه من نزف اليراع
كم وديعٍ مقدر أقول له ياهل الوديع = بينك وبين الوداعه مساحة وإتساع
لا تغرك ضحكةٍ في فم الطفل الرضيع = أه لو تدري بما بعد ضحكات الرضاع
وكم فقير كل ما حاول إنه يستطيع = ما لقى له من يد الفقر تسليمة وداع
لو بدى له في الدجى نجم وإقتاده وزيع = تاليته يودع الصبر ما للصبر داع
يمكن إن الجرح ما مر في عمره سريع = بس عمره مر في الجرح من بدري وضاع

للشاعر : ناصر بن ثويني العجمي ,

المصدر: الملتقى الجماهيري للشاعر محمد بن فطيس المري