بس (يايمه) ترا القلـب مـن فرقـاك مـاع

بس (يايمه) ترا القلـب مـن فرقـاك مـاع

مل قلب(ن) يوم عديت راس الرجم فاع= وحتمى حاميه وأركا على حدب الضلوع
موقف(ن) كنت أبتعد منه قدر المستطاع = مرقب(ن) جدد غلا العام والفرقا تروع
يمة(ن) منها الشمطري وريح المسك شاع = مدهل(ن) فيه الغلا والنوايا والدموع
يا وجودي وجد من راح عمره في ضياع = وأنتهى في غرفة(ن) لا دخول ولا طلوع
كل موحاله مع السيب مما فيه داع =صاح لا والله جزروني على أخرت ألسبوع
و بري حالي ضاق بي نجد و فجوجه وساع = و أقبلت سحب العباير علي بكل نوع
بعض الاشياء من غلاها تخص ولا تشاع = بس يبقى ذكرها طيب حظ و زين شوع
و جعل يسقى قبل أعرف الذياب من الضباع =وقبل أعرف أن الشجر له من جذوره فروع
وجعل يسقى قبل مانشرة الموجز تذاع =قبل أعاف السبت وأشفق على عصر الربوع
قبل لا دري ويش فرق الثنية والرباع =و قبل لا ياتي بقلبي من الفرقا صدوع
يابعد لا باست الشال دمثين الطباع =يا كرى عيني ليا حترت والعالم هجوع
بعد مارحتي عرفت الحقيقة والخداع =وتضح لي و يش فرق السمو من الخنوع
والوجيه اللي عليها من الخسه قناع =لا على منهج (محمد) ولا دين (اليسوع)
شفت عقبك هافي الجد والذمه شجاع =و طول عمره مايعرف السجود من الركوع
وصار غالين القرايب على (راجح)سباع=وحسب أنهم قبل هذا على جنبي دروع
مالقيت من الليالي رواق ولا شراع=غير كرهي للوفا مع خبيثين الطبوع
جعللي في الامر خيره و بالضيق أتساع =واحمد الله لو لحقني من الايام جوع
و دري أن ماعقب فرقى المحبين أجتماع =وخابر أن الموت سيف الهقاوي والرموع
بس (يايمه) ترا القلب من فرقاك ماع =مثل ماماعت من النار ذابلت الشموع
ياغلا العالم لو أعمار خلق الله تباع =كان بعتك نص عمري بلاش بلا رجوع
صار حتى (حضار) عندي من أحب البقاع =الغلا له والمشاعر توارد له جموع
فيه قبر(ن) غادي من سنا نوره شعاع =في (عيوني) عنده أخبت واعلنت الخضوع
يحتوي تحت النصايب حبيب(ن) الي مطاع =من عرفت أسمي وأنا ماشي(ن) برضاه طوع
الله الله فيه ياقبر والدنيا متاع= والله ماصخيته ولا نيب من شوفه قنوع
لاكن أمر الله ولا فيه شك ولا نزاع =واهني اللي رضا وعنى عين الجزوع
أيه .. يادايل ضوى الليل في راس الرفاع =بين صادقت المشاعر وحارقت الدموع
و يعلم الله ماجرح خاطري مثل الوداع = يوم سلمني الامانه ضحى يوم الربوع

المصدر: الملتقى الجماهيري للشاعر محمد بن فطيس المري