تختال في مشيها يسعد مسا الورده #شعر

تختال في مشيها يسعد مسا الورده #شعر

.




دحوم شب البريق وصبّه ورده

واليا قضى الاول فـ قم خدّر الثاني

النوع ممتاز والمقياس بـ المده

والذوق سكر وسط مع زعفر ايراني

في باطنٍ سايلٍ ماصار له مده

فيه الزهر والربيع اشكال والواني

واتركني اسج واغني على وده

واجاوب الهم واصرّح عن احزاني

لانيب افندم ولا ريّس ولا عمده

لكنّ والحمدلله ربي اعطاني

شاعر واعرف البحر من جزره ال مده

ماتنزل الا على الهامات قيفاني

اركب على متن جزل القاف و اكدّه

واحن بعض العرب من هيبة لساني

وان كنت مااقف في وجه الضيق والشده

منيب نسل الرجال اللي تعداني

والحلوه اللي تشد الحيل وتهده

خلتني اكسب رضاها واخسر رهاني

كنْها على الفكر باقيّة وممتده

تشّر هذا عرشي وذوليك تيجاني

تفل ليل السعد وتعوّد تكده

وتردد امن الطرب يادان ياداني

تقول ليل الشتاء حلاه في برده

واقول يكمل ليا من الغلا جاني

تختال في مشيها يسعد مسا الورده

تكة كعبها خطر لا ماتوطاني

لا واهني جاهلٍ باست على خده

واللي سمح يوم قالت له علشاني

تشتاق وتقول صبري واصلٍ حده

واليا ابردت تعتذر وتقول ماامداني

الله يهون غلاك ويقطع الصده

ويعاقب اللي على هجرك تحداني

انتي كتاب الغلا تاريخه ومجده

فـ القلب رفّك نظيف إن الله احياني

كوني كذا دام ماجد ماأحدٍ قده

والعمر يفداك دام انّه كذا فاني

-

#شعر
#ماجد_بن_محمد_اللهيب


.

المصدر: الملتقى الجماهيري للشاعر محمد بن فطيس المري