طيبك يابوخالد

طيبك يابوخالد

طيبّك يببو خاآلد هماليل وبروق=وطاريك يشبه طاري سهيل لا لاح
المدح فنجال(ن) ليمناك مسيوق=مادام طيّبك في دلال الفعل فاح
والشعر لك مسيوق والطاق مطبوق=ومسامعك من حقها جني الارباح
تفعل يمينك فعل ما هو بمسبوق=وعندك لبيبان الصعيبات مفتاح
مكانتك فوق الشواهيق من فوق=ولك في دروب المجد مسرى ومسراح
شوفتك تبهج خاطر(ن) كان مبنوق=ووقفتك تجلي هم وتداوي جراح
لاجاك من همه جبل يشتكي عوق=داويت عوقه بالدوا والجبل ساح
ولا جاك من له من ورا الظالم حقوق=عود بحقه يقلب اتراحه افراح
وخوتك تنبت في حشى القلب زملوق=وخوي جنبك من سواقيك مياح
يشفق عليها راعي الطير ويروق=لا راح معك العمر ما يعتبر راح
في خايع(ن) كله خزامى ورقروق=ريحه طوال الليل والصبح فواح
يشفي خفوق(ن) فيه من وقته فتوق=والبال مع شرواك يا شيخ ينساح
وهد العديم الي على طلعه يتوق=يرخي جناح ويوعد ويكفت جناح
لو تنطحه ما شفت في سيقه سبوق=شلايله كنها دناديش مسباح
ما طار لو من بعد ملحوق ملحوق=والخرب لا ناشه وهو عازم(ن) طاح
كنه من فواده الا طار منتوق=ما هوب للريضان لاهد مساح
من يوم جاني ما تمشيت بالسوق=ولا شريت من المحلات تلواح
مثله عن البيع وعن السوم مفهوق=ومثلك يّبو خّالد له الشعر نضاح
وشعري عن الي ما يحاليك مرفوق=ولاني لغير الطيب القرم مداح
ما غيرك وقت(ن) به العمر مسروق=عن التراث تذود بسيوف ورماح
عز القنص بالطير والخيل والنوق=فالبر خيال(ن) وفالبحر سباح
على طريق العود لأقدامك تسوق=زايد عسى الفردوس له بيت ومراح
ومن تحته انهار وعلى راسه عذوق=جعله مثل ما ريح الشعب يرتاح
الي بنى بالعزم بالرمل شاهوق=وجنى من الصبخى كمثرى وتفاح
محبته بقلوبنا شي موثوق=وغلاه مهما كان باقي ولا زاح
ابوك يا محمد على المجد من فوق=وانت اشتريت الطيب والمدح الارباح
المدح فنجال(ن) ليمناك مسيوق=تقهو دام المدح من خاطري فاح

الشاعر : محمد بن فطيس

المصدر: الملتقى الجماهيري للشاعر محمد بن فطيس المري