ماهي غريبة !

ماهي غريبة !

.

الطيب لاهل الطيب ماهو كليفي
يسهل عليهم لو طروقه صعيبه
.
رجالهم دايم جنابه مريفي
وفي كل يوم يطيب ويزيد طيبه
.
والا الردي عايش بحالٍ كسيفي
الراس خاوي والهقاوي قريبه
.
يروح عمره بين بوقٍ وزيفي
ويموت ما حاز النعم من نصيبه
.
لو صاحب الاشراف ما هو شريفي
يلحقه من دنياه شكٍ وريبه
.
ولو قال ماله بالخلايق وصيفي
لابد ما يكشف لك الوقت عيبه
.
يغرك بشكله وعقله خفيفي
وكلمه تودي به وكلمه تجيبه
.
وينعاف عمرٍ للمراجل معيفي
وان غاب ينسى وان حضر ما دريبه
.
ومن الغريب انه يطيب الضعيفي
واليا تردى قيل ما هي غريبه

.

اسم القصيده وقائلها :
" ماهي غريبة ! "

الشاعر - خليل بن هدلان

.

المصدر: الملتقى الجماهيري للشاعر محمد بن فطيس المري