الحُبّ .. / المِطَرْ

الحُبّ .. / المِطَرْ

ما به طريق ولا رفيق ، ولا ركوب ولا سفر
ودي اغادر وانصدم .. إني فقدت الأربعه !
ما باقيٍ غيري / على كثر الفيافي والبشر
تومي بي كفوف الشمل : في كف يمنى المقطعه
وأشيّل كتوفي الحمل .. وأعلّم جفوني السهر
وأملى خفوقي بالبكا .. لين الحنايا تدمعه
وامدّ شوفي واكسره !! وامد قلبي وأنكسر !
وأرجع على اللي لا نبض قلبي ، فقلبي اسمعه
اللي محى من خافقي / كل الاسامي والصور
كنه لمن قبله يقول : الله معه الله معه
كنه وقلبي فالهوى ، قبطان مركب في بحر
تنوخذه واستحوذه وابحر .. وفلّ الاشرعه
ويمّم على [ وجهة غياب ] ولا ترك خلفه عذر
حتى لو اعذاره " م " هي في كل مره مقنعه
دايم وهو / وافي جفا .. ولا الوصل فيما ندر
مع إن ما عنده سبب ؛ في وصل قلبي يمنعه
يا قسوته وأنا على [ قاع الرجاوي منهمر ]
أمني النفس ( بعسى .. دربٍ خذاه يرجّعه )
وأقول لأشيائه معي .. ما للغياب إلا الصبر
وإن خالفتني ، قلت : ما في قطع مثله منفعه
اللي قبل لا أعشقه .. وأنا على بيته أمر
وبالنبض اطلّع مدة الوقت / اللي لأجله بأقطعه
ومن بعد عشقه ما بقى .. شيٍ معي ما ينتظر
صوتٍ ينسينا دفاه ، الكون هذا .. بأجمعه
وشلون مع هذا الغلا والشوق والحب / المطر
أنساه ، وأجبر خافقي يجذب غلاه وينزعه
بأبقى أحبه وأعشقه .. لآخر دقيقه فالعمر
وفداه قلبي لو لقى من جور صده مصرعه !




لـ الشّاعر / محمّد السبيعي

المصدر: الملتقى الجماهيري للشاعر محمد بن فطيس المري