من باب تقدير المواقف والاحباب

من باب تقدير المواقف والاحباب

من باب تقدير المواقف والاحباب=وأسباب هنات العيون وسهرها
لبا عيون الباب واللي وراء الباب= اللي قصر في كلمته وختصرها
حديثه أحلي من طعم در حنزاب= في روضه (ن)عانق مطرها زهرها
واحلامها اعلام وتواريخها كتاب= تزرع محبتها وتقطف ثمرها
ومنزالها بين النواظر والاهداب= لها دهر تحتلها وتعمرها
واليا زعلت تشره عليها وتنساب= بالرغم من حرص العيون وسهرها
وتلقالها بين المحاديب ترحاب = لبيه ياشمس الرياض وقمرها
لوكان مابه عذر نجعلها اسباب= و نقول أكيد ان الظروف تعسرها
يافلسفه سقراط واحساس زرياب=كل الاموار الخافيات تخبرها
ماردني من وصلك اهوال واحزاب=أخاف طيب معرفتك اخسرها
اعجاب لا والله تعديت الاعجاب =هنا بلا بين الضلوع يعصرها
يثر على وانوخ حمول وركاب = واترك مباهج خاطري وحقرها
اليل ماله صبح والصبح كذاب =شمسه ثمان سنين وانا انتظرها
احاتي الغياب وشك وارتاب =وارتاع من فرقا الغصيبه واثرها
من قصه الحبل وملاويه والداب=حرصي وخوفي صورة (ن) من صورها
الثلج ذاب الاعسي الثلج ماذاب= لا ذاب عود للجروح وغمرها
للوصل باب الا له ابواب وابواب =اللي دخلها شوق واللي هجرها
ياحباب ردوا باقي ايام ياحباب=قبل الرواحل تشتقي في سفرها
عندي لكم نفحات جوري وعناب = ومدة كريم (ن)بالوفا ماقصرها
هبت شمال وتهت والشوق غلاب =ولقتني البيض السواري ظهرها
ورجعت ادور لك وانا جد منصاب = واقوال ياشمس الرياض وقمرها
لبا عيون الباب واللي وراء الباب =اللي قصر في كلمته واختصرها

المصدر: الملتقى الجماهيري للشاعر محمد بن فطيس المري