( تكفي غلاك وحشمتك )

( تكفي غلاك وحشمتك )

السلام عليكم ورحمة الله وبركاته

ارجو ان تنال استحسانكم






يالله ياللي سجدتي لرضاك مطلبنا رضاك
ــــــــــــــــــــــــ وكلا ً برجوى رحمتك يالله يالله رحمتك

اذ نساك الغافل الجحاد فكري ما نساك
ـــــــــــــــــــــــ اذكرك واشكر نعمتك فاتمم علينا نعمتك

واذا عصاك الظالم الفسقان قلبي ما عصاك
ـــــــــــــــــــــــ نخاف فجأت نقمتك اعوذ منها نقمتك

سماك عظمى وانت سلطان ٍ على عظمة سماك
ـــــــــــــــــــــــ تماسكت من عظمتك واستصغرتها عظمتك

ياربنا فيك الرجا ما خاب ظنه من رجاك
ــــــــــــــــــــــ وما صابنا من قسمتك نرضى قضاك وقسمتك

انت السميع لمن دعاك وتستجيب لمن دعاك
ـــــــــــــــــــــــ تستعجله من حكمتك وتأخره من حكمتك

احفظ عبادك من غلو عداك لا تبقي عداك
ــــــــــــــــــــــ اوطاننا في ذمتك وارواحنا في ذمتك

وارسل سحاب ٍ راكد ٍ به ماك يسقينا بماك
ـــــــــــــــــــــــ من يوم تبدي نجمتك حتى توارى نجمتك

وياليل ياللي مارسراك الا حزين ٍ قد سراك
ـــــــــــــــــــــــ احد ٍ مماته ظلمتك واحد ٍ حياته ظلمتك

ذعذع هواك ومشكلة قلبي اذا ذعذع هواك
ــــــــــــــــــــــــ وده بلفحة نسمتك واكبر عذابه نسمتك

كمَل صفاك ولا بقى الا ما يعكر لك صفاك
ـــــــــــــــــــــــ خفف علي من هجمتك ماني بقاوي هجمتك

ويا رجم ياللي من رقاك يقول ليته ما رقاك
ــــــــــــــــــــــ يبغي الشلا في قمتك واثر البلا في قمتك

من كثرة همومه نصاك وزاد همه لا نصاك
ــــــــــــــــــــــ ما همتك بعض العرب وهمومها ما همتك

كم من صويب ٍ قد بداك وراح ما كنه بداك
ــــــــــــــــــــ متولع ٍ في زمتك واليوم فارق زمتك

ويا عد ياللي من ضماك وجاك زدته من ضماك
ــــــــــــــــــ يشوف لمعة جمتك ولا سقيته جمتك

ياصاحبي مهما وراك اقفيت ما نمشي وراك
ــــــــــــــــــ عندي غلاك وحشمتك تكفي غلاك وحشمتك

تعبت في مطلب رضاك وما تهيا لي رضاك
ــــــــــــــــــ لو مابقى الا رحمتك ماني براجي رحمتك








وسلامة نواظركم

المصدر: الملتقى الجماهيري للشاعر محمد بن فطيس المري