القمر وضاح

القمر وضاح

التفاهم والصراحه شي لازم يا جماعه
ما على قولي غبار وما على صمتي ملامه

كل واحد يبذل المجهود حسب الاستطاعه
بس في غيري ابد ما بان ناموس الزعامه

لي ثلاث سنين والتاريخ يرميني شراعه
كل موج يثور من صوبه يوردني الندامه

ان تكسبنا القصايد ريتها صارت بضاعه
وان تخيرنا الفرايد ضاع تعبير الهلامه

الشعر وهبه من الله لا تظنونه صناعه
من وهبه الله جاب الزين في مجمل كلامه

وان غدى للقاف ميدانٍ حشى ما به فراعه
يا عوين اللي يدور عن مخاريج السلامه

للنجوم انوار يبصرها البصير بوسط قاعه
والقمر ظاهر وبين والعرب تعرف مقامه

ليت بعض الناس تدري وش هي اضرار اللكاعه
كان سارو فالطريق الزين حسب الاستقامه

والله اللي قد وهب والعبد يلزمه القناعه
ما يفيد ايجر صوته كل ما اوحى له حمامه

سارعي للمجد والعليا وهاتي لي مناعه
وارفعي الخفاق الاخضر في ربا نجد وتهامه

اعتراف الناس ما هو عيب لو بان انطباعه
وانتشار الباطل بيفنى ولو تكثر سهامه

كوكبٍ دري في قلبي على الدنيا شعاعه
كنه النور المبين اللي كشف عين القيامه

ما معي ثاني بوسط المنتدا يفرض سناعه
البعير شعيل واقف ما خذيت الا سنامه

وان نظرت بعينك لراس الهرم عفت الطماعه
ما تلاقي غير راسي فوق صفات الغمامه

واقعٍ ما هو كئيب وكل شخص وله ذراعه
من هو اللي يحتمي الميقاف في يوم الجهامه

العقول ارضٍ حرثناها وجودنا الزراعه
حد جنا المحصول ناضج واحد ما حاين تمامه

كاسبين العز واجد بس ما للشعر راعه
كاسبينه قوم ينعدون في حزة صدامه

النفوس بداخل الاجساد من ربي وداعه
والمشاعر فالعروق تسير وتحدد نظامه

يا نجوم المنتدا خفو علي في ظرف ساعه
القمر وضاح يجلي عتمة الليل وظلامه

المصدر: الملتقى الجماهيري للشاعر محمد بن فطيس المري