أنا هواي أشقر الجنحان,,

أنا هواي أشقر الجنحان,,

بسم الله الرحمن الرحيم ,,

وعليكم السلام ورحمة الله وبركاته ,,

أسعد الله مساكم وصباحكم بكل خير وكل سرور,,

أقدم لكم أبيات وهي قديمه ايام الصقور والولع ولوباقي حبها لكن الظروف تحكم بيني وبينها وقبل ايام يكلمني محمد عواد الشراري راعي صقور يقول نبي نقنص معي شيهانه وطرت لي هالقصيده قلت نجددها امامكم ,,

لكم الابيات وكل امل ان تنول اعجابكم وتحوز على رضاكم.

أنا هواي اشقر الجنحان=حر ٍ ينومسني بنقله
فرخ ٍ وحش لاشهر ثم بان=ماكل صقار يعلق له
أدقاق ريش وصدر مليان=ومناكبه ماتدقق له
مسرول الرجل والعكفان=كنها من الدم تعنق له
الياهوى مرتع الرضيان=صلف الهوى مايصافق له
مع درب خرش ٍ رمى وأهتان=لاهد هده يوافق له
ماكنه الا فعل سبلان=ماضي فعوله تطوق له
اليا نزلنا مع مسيان=في مرتع ٍ قد تعذق له
شمال من نزهة العقلان=ويمين عن سكة العقله
مع جول ٍ يهيض الاشجان=قام يتدارج على دقله
وكشفت عنه ورمى الاعيان=حدق النواظر تعمق له
وأخذبهن فالهوى ميدان=ثم حول بخرب ٍ بثقله
يومي به الريش والنقصان=ياعنك محد ٍ بشافق له
يطرح عشاه ويزود أعنان=مثل العديم ان تفرق له
لاواجه القوم والفرسان=محد ٍ عن الهوش ناطق له
ملحوم مخلابه النومان=مافيه شي ٍ يغمق له
هذى هوايه عن الشيهان=الي هددها يسبق له
لو هي على الطوع فيها اجنان=والسبق ماهوب تنتق له
لاشك تفرق عن الشقران=بالفعل والعزم والدقله
شي ٍ مضالي وانا شفقان=على الهدد والولع حقله
كان الزمن عاد لي ثم زان=دعواي ياربي تعقله

وسـلامة نواظركم وقلوبكم ,, خالد العبيريد.

المصدر: الملتقى الجماهيري للشاعر محمد بن فطيس المري