ليت الهجر بين المحبين ممنوع - الملتقى الجماهيري للشاعر محمد بن فطيس المري

#1 09-12-2012, 11:32 PM

ليت الهجر بين المحبين ممنوع
ويلقى الوصل بين المحبين مرباع

العمر فاني..كنه يمر فاسبوع
ليه نتحمل هم واوهام واوجــاع؟؟

ليه السهر والدمع والياس والروع
والله خلق للوصل اشكال اونواع

يا زين ما ضرك لو اهديت قرطوع
للي ظما لاجلك وغير لك اطباع

ليه اتصيقه صوت خابره مسموع؟؟
وليه اتعمد تقلب اوضاع باوضاع؟؟

وليه الهجر بالذات لك حق مشروع؟؟
وانا عيوني للهنا صرات جياع

الهجر مركب في بحر كله دموع
الحزن لي مجداف وهمومي شراع

حبل المودة من يدك صار مقطوع
اوصيتني بالود بس الحكي ضاع

تركت (باقي آدمي) منك موجوع
كنه محول من عماره على قاع

تمسي..وانا راسي تمركا على كوع
اسهر واراجع لي بدايات ملتاع

اشعلت من ذكرى بداياتنا شموع
واذكر عيونن دعج يا صاح ووساع

البعد كاوي والجفا مثل فاروع
وقلبي مجسم حب..وبغيبتك مـــاع

(حسيبك الله لعتني بالهوى لوع)
اهديك قلبي..وانت تهديني أوجاع!!!!!

ناصر المري

الذين يشاهدون محتوى الموضوع الآن : 1 ( الأعضاء 0 والزوار 1)