توديعك اقسى من رحيلك وذكراك ..

توديعك اقسى من رحيلك وذكراك ..

السلام عليكم أحبّتي .. الله يمسّيكم بالمسرّات
دونكم الجديد يا هل القصيد .. <<أنفع محرّج ؟!

توديعك اقسى من رحيلك وذكراك

قال الوداع .. وقلت: يا حَرّ فرقاك !!=يا طول ليلي بين فقدك ، وطاريك !!
ودعتني بالأمس واليوم ناداك=دمع الرجا قبل المشاعر تناديك
توديعك اقسى من رحيلك وذكراك=ليتك بلا توديع فارقت مغليك
حبستني ما بين باب ٍ وشبّاك=رحَلت قبل اسمع بقايا حكاويك
يا تنتظر .. ياتعلّم القلب ينساك=والّا توصّف لي دروبك واوافيك
لاوين رايح ؟ وين يا صاح ابلقاك ؟=وين اهتدي لك كان طالت مساريك ؟!!
يا جعل ربّي وين ما رحت يرعاك=الله يحقّق لك طموحك وامانيك
اليا خذاك البُعد عنّي وبطّاك=سلوان نفسي في تعاليل ماضيك
ان ضاق صدري من صدودك وجفواك=افتح مكاتيبك واناجي طواريك
أقرا حروفك وابتسامتك واقراك=واتخيّلك تقرا عتابي .. واواسيك
في ناظري حلم ٍ تهنّى بلاماك=وفي خافقي طير ٍ يتابع خطاويك
أضويت لك بين المجرّه والافلاك=شوق ٍ يهادي خطوتك يمّ غاليك
توديعك اقسى من رحيلك وذكراك=ليتك بلا توديع فارقت مغليك

وسلامتكم

المصدر: الملتقى الجماهيري للشاعر محمد بن فطيس المري