يا مرحبا يالهجوس

يا مرحبا يالهجوس

يا مرحبا يالهجوس اللي لنا كم شهر
.........................انا مريَح وهي قد قفَلت بابها
اول وانا كنت فيها ذايبٌ منصهر
.........................يلين عدّيت نفسي سيد احبابها
وان لاع قلبي لوايع من ليوع الدهر
.........................جتني تغطرف وتحمل كامل زهابها
ويوم قلبي جلى عنّه كثير القهر
.........................تريّحت مثل قلبي وناخت اركابها
لكن جتني على فايح جمر يدّهر
.........................من داخل القلب يستفزع وينخا بها
جتني بسيفٍ شطير وطوقها من زهر
.........................متبختره مثل أميره تكايد اصحابها
وانا وربي اني اعشقها وسقت المهر
.........................من دم قلبي ومن فكري على حسابها
يا مرحبا كُثر مانا كنت منك انبهر
.........................وكثر ما الروح دوّيتي في اشعابها
يا كنّك الشمس وانا مثل وقت الظهر
.........................والشمس وقت الظهر ما يصلح غيابها
اعشقك معشاق فارس للاصيل المهر
........................وعشق الصقور الحرار لصيد مخلابها
هاتك هنا بين ضلعان الصدر والظهر
...........................يا تطفي النار والا تزيدي احطابها
ذي صورة اللي تسبب لي العنا والسهر
..............................تمعّني في جدايلها وفي اهدابها
وهذي نتوق الجروح تسيل مثل النهر
.........................الله يسامح هنوفٌ هي من اسبابها
وانتي ترى ذا مكانك بين سرّ وجهر
.........................يا مرحبا يا عشيقة شاعرٌ جابها

المصدر: الملتقى الجماهيري للشاعر محمد بن فطيس المري