محاورة بين عبدالله بن جابر السفياني وياسر بن سعود الذويبي

محاورة بين عبدالله بن جابر السفياني وياسر بن سعود الذويبي

عبدالله السفياني



ياياسر الليل طول والحقيقه سراب
والحلم مافسره مفسر احلامي
تنظر بعينك جنوب ولا تشوف السحاب
والوقت يمضي وعاما جاء بعدعامي


ياسر
مابين عقرب ثرى وانياب وعيون داب
عشنا وشفنا الحقايق مثل الاوهامي

مادام نفسي عزيزه ماحسبت الحساب
امشي وكل السحايب تحت الاقدامي


عبدالله
ياللي عرفت الرسالة قبل تقرا الكتاب
واتقدّر احروفها بعدّ الارقامي

اضروسك الاوله تبقى مع الانياب
صعبا تغير مادام المقصد السامي

ياسر
ماعاد لي قدره اكتب لك واعد الخطاب
الفكر بعدك تولّج به تسونامي

السن مكسور مير الشكل باقي شباب
والعلم مطلوب دام العمر قدامي

عبدالله
يابلشت اللي يحدث في جموع اعراب
مايسمعونه عبط لوهبت انسامي

امثبت الخيمة الاركان والاطناب
لوهبها اعصار من شرقن ومن شامي

ياسر
لاشفت نفسك ولد سرحان بين ذياب
كب العوا واتجه للدين الاسلامي

ان كان لك صك في خيمتك خل الباب
مفتوح لام الحوايج وام الايتامي


عبدالله
العين ماتشتكي لو تجرح الاهداب
تصبر على مابها لو جرحها دامي

بعض الاوادم يفكر فكرة اهل الغاب
مايعرف الانظمة لوجاع وانظامي


ياسر
العين صفّا نظرها عالي المرقاب
والصبر فيه الحلا مع مر الايامي

من اول المعركه بخيول ماترتاب
واليوم كل البلا بحقول الالغامي

عبدالله
يالي تشورب ويش اللي جاء مع الاشناب
والفعل واضح مابين اجداد واعمامي

منته بكبتن ولو انك لبست الكاب
تسرح وتمرح ولا لك بصمة ابهامي

ياسر
بعطيك وصفه طبيعيه من الاعشاب
ترويك طول الزمن لو عشت به ظامي

بصمّت بام النياشن والمقبّس شاب
شربت شهايد يميني حبر الاقلامي

المصدر: الملتقى الجماهيري للشاعر محمد بن فطيس المري