الناس تعرف بالطبايع والأفعال

الناس تعرف بالطبايع والأفعال

.
.
.


يا رجل لا تنقل نبا كل نقال
به ناس حتى الميت ما يتركونه

والقيل عندي له مفاتيح وأقفال
معناي ما كل العرب يفهمونه

ولا أقول أنا زايد على كل رجال
كم واحدٍ ما يقصر العرف دونه

خص الرجال اللي يجيدون الأمثال
البيت عن معناه ما ينقصونه

أخص لي ناسٍ يحوسون الأقوال
البيت لو هو معتدل يكسرونه

لو هم كبار أعمار بالعرف جهال
ومن عمي قلبه ما تفيده عيونه

وان شفت لي شخصٍ خيالي وخيّال
ما اشفق عليه ولا تدخل بشونه

ينبيه عن حظه تواريخ الأجيال
يجهل خبر والناس ما يجهلونه

يشوف نفسه وين ما مثله أمثال
ترميه بأحضان الجهالة ظنونه

والناس تعرف بالطبايع والأفعال
واللي تعزّه سمعته يمدحونه

والماء يجيبه عذب ويجيبه احثال
والكون به من كل كاين نمونه

-

#شعر
بدر الحويفي

.

المصدر: الملتقى الجماهيري للشاعر محمد بن فطيس المري